ԵՐԵՎԱՆ, 30 հունիսի – Sputnik. Ընդդիմությունը այս պահին ձախողել է, քանի որ Նիկոլ Փաշինյանը դեռ զբաղեցնում է վարչապետի աթոռը, սակայն ընդդիմադիր խմբակցությունների բոլոր պատգամավորների մանդատը վայր դնելու դեպքում ոչինչ տեղի չի ունենալու։ Նման տեսակետ Sputnik Արմենիայի հետ զրույցում հայտնեց «Պատիվ ունեմ» խմբակցության ղեկավար Հայկ Մամիջանյանը` անդրադառնալով ընդդիմության դեռ խորհրդարանում լինելու պատճառներին։
Ընդդիմադիր պատգամավորն ընդգծում է, որ իրենցից ավելի խիստ իրենց ոչ ոք չի քննադատում և իրենք էլ գիտակցում են, որ եթե Փաշինյանը դեռ վարչապետի աթոռին է, ուրեմն ընդդիմությունը լավ չի աշխատում
«Մանդատը դնելը, այո, գործիք է, բայց դրանից հետո ոչ մի բան տեղի չի ունենալու, խորհրդարանը չի լուծարվելու։ Կլինեն գործընկերներ, որոնք կասեն` դա կառաջացնի քաղաքական ճգնաժամ, բայց սրանից «բեթար» քաղաքական ճգնաժամ դժվար է պատկերացնել»,–ասում է Մամիջանյանը։
Մեկ այլ դիտարկմանը, թե մանդատներ դնելը հնարավորություն կտա Հայաստանին հայտնվել միջազգային կառույցների ուշադրության կենտրոնում, նա հակադարձում է.
«Երբ դատարանի դահլիճում մարդ են սպանում, երբ փաստաբան են ծեծում, երբ Արմեն Աշոտյանին և մյուս քաղբանտարկյալներին ապօրինի պահում են անազատության մեջ, երբ խաղաղ ցուցարարի վրա կրակում են, ու միջազգային կառույցների ուշադրություն չեն դարձնում, մանդատներ վայր դնելու դեպքում էլ որևէ ակնկալիք պետք չէ ունենալ»,–նշեց պատգամավորը։
Այնուամենայնիվ նա ընդգծում է` մանդատները դնելու ժամանակ գալու է, բայց դա այն հերթական գործիքն է, որը պետք է կիրառվի ուժեղացնելու համար հանրային կոնսոլիդացիան։
Իսկ թե ինչ է անում և ինչու է մինչև հիմա ընդդիմությունը խորհրդարանում՝ ընդդիմության ներկայացուցիչը այսպես է բացատրում.
«Եթե ընդդիմությունը չմասնակցի այս կամ այն խորհրդարանական վեհաժողովներին, այս կամ այն պատվիրակությունների հետ հանդիպումներին, ապա ՔՊ–ականները ներկայացնելու են աշխարհին, իբր Հայաստանում կոնսենսուս է Արցախը հանձնելու հետ կապված, իրենք երբեք ինքնորոշում բառը չեն ասելու։ Էլ չեմ ասում, որ կկարողանան կերակրել մեզ բոլորիս այն ստերով, ինչպես փորձում էին անել, մինչև Արմեն Աշոտյանը հրապարակեց բանակցային գործընթացի սկզբունքները, իսկ ես բերեցի դրա վերահաստատումը եվրոպացի գործընկերներից»։
Վերջում Մամիջանայնը հավելեց, որ երջանկությամբ այլևս ԱԺ նիստերի դահլիճ չի մտնի, սակայն կան գործողություններ և աշխատանք, որը հանուն հայրենիքի է և պետք է անել` անկախ նրանից՝ ցանկանում ես, թե ոչ։