Ուկրաինային ՆԱՏՕ ներքաշելը հանգեցնում է հակամարտության սրման. ՌԴ ԱԳՆ

ԵՐԵՎԱՆ, 29 հունիսի – Sputnik. Կիևին ՆԱՏՕ ներքաշելը հանգեցնում է հակամարտության սրման։ ՌԻԱ Նովոստիին այս մասին հայտնել են ՌԴ ԱԳՆ-ից` մեկնաբանելով դաշինքին Ուկրաինայի անդամակցությանն աջակցելու Փարիզի ծրագրերը:
Ավելի վաղ «Le Monde» թերթը, հղում անելով իր աղբյուրներին, հայտնել էր, որ Ֆրանսիայի իշխանությունները ՆԱՏՕ-ին Ուկրաինայի միանալու տարբերակը դիտարկում են որպես անվտանգության ինքնուրույն երաշխիք:

«Եթե Փարիզն իսկապես ցանկանար Ուկրաինային բանակցությունների սեղանի շուրջ նստեցնել, ապա արժեր ոչ թե գործը տանել դեպի հակամարտության սրացում` ՆԱՏՕ-ին ներքաշելու միջոցով, այլ ճնշում գործադրել Զելենսկու ռեժիմի և Վաշինգտոնից ու Լոնդոնից նրա համակարգողների վրա»,-հայտարարել են ՌԴ ԱԳՆ-ում։

Նախարարությունում կարծում են, որ հենց նրանց պնդումով է Կիևը հրաժարվել շարունակել երկխոսությունը Ռուսաստանի հետ, և հենց Ուկրաինային ռազմական դաշինքին անդամակցելու խոստումներն են նրան ագրեսիվ պահվածքի հրահրել։

Գերատեսչությունում հիշեցրել են, որ ՌԴ-ն ռազմական հատուկ գործողությունը սկսել է Դոնբասում մարդկանց սպանությունը դադարեցնելու համար, գործողության նպատակներից մեկը Ուկրաինայի ապառազմականացումն է, ինչպես նաև նրա չեզոք կարգավիճակի ամրապնդումը, որը բացառում է որևէ ռազմական կոալիցիայի մասնակցություն:

Հիշեցնենք` նախորդ տարի Մոսկվան ՆԱՏՕ–ի երկրներին նոտա հղեց Կիևի իշխանությունների զենք մատակարարելու պատճառով։ ՌԴ արտգործնախարար Սերգեյ Լավրովը հայտարարեց, որ Ուկրաինայի համար ռազմական տեխնիկայով բեռնված ցանկացած տեղափոխման միջոց օրինական թիրախ կհանդիսանա ՌԴ բանակի համար։ Ըստ նրա` ԱՄՆ–ն և դաշինքը անմիջականորեն մասնակցում են հակամարտությանը ոչ միայն զենք փոխանցելով, այլև Մեծ Բրիտանիայի, Գերմանիայի, Իտալիայի և այլ երկրների տարածքներում կադրեր պատրաստելով։