ԵՐԵՎԱՆ, 29 հունիսի - Sputnik. ՀՀ քննչական կոմիտեում բացահայտվել է բազմաթիվ անձանց ներգրավմամբ Telegram սոցիալական կայքի միջոցով թմրամիջոցի ապօրինի խոշորածավալ շրջանառությամբ և դրանից ստացված առանձնապես խոշոր չափերով փողերի լվացմամբ զբաղվող հանցավոր խումբ։ Տեղեկությունը հայտնում է ՀՀ ՔԿ մամուլի ծառայությունը։
Քննությամբ պարզվել է, որ Ա. Մանուկյանը, Կ. Մանուկյանը, «Հանրային ձայն» կուսակցության նախագահ Արտակ Գալստյանի որդին` Հ. Գալստյանը, ինչպես նաև ինքնությունը չպարզված մի շարք անձինք 2019թ.-ից «Telegram» հավելվածում ստեղծել և կառավարել են «N…», «Nа…» և գրեթե նույնանուն 7 այլ առցանց խանութ-հարթակներ:
«2019-2023թթ.–ի ընթացքում վերոնշյալ անձինք այդ խանութ-հարթակների միջոցով տարբեր անձանց ապօրինի իրացրել են առանձնապես խոշոր չափերով մեթանֆետամին և մարիխուանա տեսակի թմրամիջոցներ, ինչպես նաև իրացման նպատակով ապօրինի շրջանառել են առանձնապես խոշոր չափերով կոկաին, մեթամֆետամին, LSD, մարիխուանա և ՄԴՄԱ տեսակի թմրամիջոցներ»,– ասվում է հաղորդագրությունում
Թմրամիջոցների ապօրինի իրացումից ստացված ֆինանսական միջոցները ընդհանուր կազմել են 1մլրդ 152 մլն 734 հազար 220 դրամ։
Հանցակիցների կողմից ապահովվել է, որ առանձնապես խոշոր չափերով թմրամիջոցներն առանձնացվեն ըստ քաշերի, փաթեթավորվեն և նախապես տեղադրվեն ՀՀ տարբեր քաղաքներում գտնվող թաքստոցներում։
Ա. Մանուկյանը, Կ. Մանուկյանը և Հ. Գալստյանը թմրամիջոցների իրացումից ստացված առանձնապես խոշոր չափերով ֆինանսական միջոցների հանցավոր ծագումը, տեղաշարժն ու տեղաբաշխումը քողարկելու, ստացված դրամական միջոցներին օրինական տեսք հաղորդելու, այսինքն «փողերի լվացման» նպատակով ի սկզբանե թմրամիջոցների վաճառքի համար հաճախորդներին տրամադրել են գրեթե ամենօրյա ռեժիմով փոփոխվող կրիպտոարժույթային դրամապանակներ։
Հետագայում նրանք փոխանակել են այդ կրիպտոարժույթները ՀՀ դրամով և փոխանցել են թե՛ իրենց, և թե՛ իրենց հետ փոխկապակցված անձանց, այդ թվում՝ «Հանրային ձայն» կուսակցության նախագահ Արտակ Գալստյանի կնոջ՝ Վ. Գալստյանի, ինչպես նաև Բ. Սաքանյանի և Ա. Մարկոսյանի անուններով բացված էլեկտրոնային դրամապանակներին, որոշ դեպքերում՝ բանկային քարտերին, որոնք կանխիկացվել և տնօրինվել են խմբի անդամների կողմից։
Ձեռք բերված փաստերի հիման վրա վարույթն իրականացնող մարմնի կողմից միջնորդություն է ներկայացվել հսկող դատախազին` նշված անփանց հանդեպ առանձնապես խոշոր չափերով թմրամիջոցների ապօրինի իրացնելու և առանձնապես խոշոր չափերով փողերի լվացման հոդվածներով հանրային քրեական հետապնդում հարուցելու վերաբերյալ։ Միջնորդությունը բավարարվել է ։
Նշված անձանցից 5-ին, այդ թվում Վ. Գալստյանին, ներկայացվել է մեղադրանք, նրանք կալանավորվել են։
Հ. Գալստյանի նկատմամբ ևս որպես խափանման միջոց ընտրվել է կալանքը և հայտարարվել հետախուզում։
Վերջինս հայտնաբերվել է Վրաստանում և ձերբակալվել։
Նախաձեռնվել է նրան ՀՀ իրավասու մարմիններին փոխանցելու իրավական գործընթաց։
Քրեական հետապնդման ենթարկվող մյուս երկու անձանց նկատմամբ հարուցվել է հանրային քրեական հետապնդում և կայացվել է վերջիններիս ձերբակալու որոշում՝ դատարան ներկայացնելու նպատակով։