ԵՐԵՎԱՆ, 29 հունիսի – Sputnik. ՀՀ–ը շարունակում է գտնվել բարձր տնտեսական ակտիվության տիրույթում։ Կառավարության նիստում այս հայտարարությունն արեց ՀՀ վարչապետ Նիկոլ Փաշինյանը` վկայակոչելով Վիճակագրական կոմիտեի հրապարակած վերջին տվյալները։
«Ուրախությամբ պիտի արձանագրեմ, որ այս տարվա մայիսին նախորդ տարվա մայիսի նկատմամբ 13.7 տոկոս տնտեսական ակտիվության աճի ցուցանիշ է արձանագրվել»,– ասաց Փաշինյանը` հիշեցնելով, որ 2022թ–ի մայիսին արդեն իսկ բավական բարձր տնտեսական ակտիվություն էր գրանցվել` 10.8 տոկոսի չափով։
Վարչապետի խոսքով` ՀՀ բանկային համակարգում ևս ռեկորդային ցուցանիշներ են գրանցվել։ ՀՀ բանկերում պահվող ավանդները 2023—ի մայիսին հասել են 5 տրլն 147 մլրդ 288 մլն դրամի, ինչը 12 մլրդ 841 մլն դրամով շատ է ապրիլի ցուցանիշից։ Իսկ 2018թ–ի մայիսի համեմատ ՀՀ դրամական ավանդների պորտֆելը գրեթե կրկնապատկվել է։
«Բոլոր մարտահրավերներին մեր արձագանքը շատ կարևոր է, որ լինի այսպիսին։ Տնտեսական զարգացումն այն ամենաէական գործոնն է, որ մեզ պետք է հնարավորություն տա հասցեագրել մեր պետության առաջ ծառացած բոլոր հիմնախնդիրները»,– ասաց Փաշինյանը։
Վիճակագրական կոմիտեի հրապարակած տվյալների համաձայն` 2023թ.-ի հունվար–մայիսին տնտեսական ակտիվության ցուցանիշը Հայաստանում աճել է 12,5%–ով, այսինքն` գրեթե պահպանվել է անցած տարի գրանցված աճի մակարդակի վրա։
Պաշտոնական վիճակագրությունը նաև վկայում է, որ տնտեսական աճի կառուցվածքը ևս անցյալ տարվա համեմատ չի փոխվել. այստեղ նախկինի պես գերակշռում են առևտուրն ու ծառայությունները (աճը` համապատասխանաբար 24,5% և 19.9%), ինչպես նաև շինարարությունը (16, 7%)։ Արտաքին առևտուրն ընթացիկ գներով հաշված աճել է 86.9%–ով, որտեղ արտահանումն ավելացել է 93.3%–ով, ներմուծումը` 83.3–ով։
Արդյունաբերության աճը կազմել է 3 %։ Գնաճի ցուցանիշը 5.2 % է։