Որքա՞ն ժամանակ տնտեսական ցուցանիշները բարձր կմնան ՀՀ–ում. տնտեսագետը` վտանգների մասին

Հայաստանի տնտեսությունը շարունակում է բարձր աճ ապահովել ի հաշիվ ուղևորահոսքերի ու դրամական փոխանցումների բարձր մակարդակի, ինչպես նաև արտաքին առևտրի ծավալների աճի։ Sputnik Արմենիայի հետ զրույցում այս տեսակետը հայտնեց «Ամբերդ» հետազոտական կենտրոնի փորձագետ, տնտեսագիտության թեկնածու Հայկ Բեջանյանը` վերլուծելով 2023թ–ի մայիսի տնտեսական ակտիվության ցուցանիշները։

«Նշանակալի է, որ վերջին շրջանում արձանագրվել է նաև տուրիզմի ոլորտի զգալի հավելաճ` տուրիստական հոսքերի զգալի ավելացում, որն իր հերթին գալիս է լրացնելու ՌԴ քաղաքացիների, ռելոկանտների ներհոսքերը, ինչպես նաև դրամական փոխանցումների ներհոսքն ու դրա արդյունքում գեներացված պահանջարկի ավելացումը, որն էլ բարձր տնտեսական աճի հիմնական գործոնն է»,– ասաց Բեջանյանը։

Ինչ վերաբերում է առաջիկա ամիսների կանխատեսումներին, տնտեսագետը նշեց, որ տնտեսական ցուցանիշները մեր երկրում կշարունակեն բարձր մնալ այնքան ժամանակ, քանի դեռ կշարունակեն բարձր մնալ դեպի Հայաստան ուղևորների ու դրամական փոխանցումների ներհոսքերը, արտաքին առևտրի ու վերաարտահանման հնարավորությունները։

Վիճակագրական կոմիտեն հրապարակած տվյալների համաձայն` 2023թ.-ի հունվար–մայիս ամիսներին տնտեսական ակտիվության ցուցանիշը Հայաստանում աճել է 12,5%–ով, այսինքն` գրեթե պահպանվել է անցած տարի գրանցված աճի մակարդակի վրա, հակառակ ՀՀ կառավարության ու միջազգային փորձագետներ ավելի զուսպ ու հոռետեսական կանխատեսումների, ըստ որոնց` 2022-ի բազային էֆեկտի թուլացման հետևանքով տնտեսական աճը ՀՀ–ում այս տարի պետք է կրկնակի դանդաղեր։

Պաշտոնական վիճակագրությունը նաև վկայում է, որ տնտեսական աճի կառուցվածքը ևս անցյալ տարվա համեմատ չի փոխվել. այստեղ նախկինի պես գերակշռում են առևտուրն ու ծառայությունները (աճը` համապատասխանաբար` 24,5% և 19.9%), ինչպես նաև շինարարությունը (16, 7%)։

Արտաքին առևտուրն ընթացիկ գներով հաշված աճել է 86.9%–ով, որտեղ արտահանումն ավելացել է 93.3%–ով, ներմուծումը` 83.3–ով։ Արդյունաբերության աճը կազմել է 3%։ Գնաճի ցուցանիշը 5.2 % է։