ԵՐԵՎԱՆ, 28 հունիսի – Sputnik. Արցախյան 44-օրյա պատերազմը սկսվեց Հայաստանի համար ոչ բարենպաստ պայմաններում։ Այս մասին իր տարածած հայտարարությունում գրել է ՀՀ ԶՈւ գլխավոր շտաբի նախկին պետ Օնիկ Գասպարյանը` նշելով, թե ինչ է ներկայացրել 44-օրյա պատերազմի հանգամանքները քննող հանձնաժողովին։
Նա ընդգծել է, որ ՀՀ իշխանություններին 44-օրյա պատերազմի ժամանակ չի հաջողվել իրականացնել ԶՈւ 2018-2024 թվականների արդիականացման ծրագրով նախատեսված միջոցառումները։
«Մեզ չի հաջողվել իրականացնել նաև սպառազինության ու ռազմական տեխնիկայի ձեռքբերումները։ Այդ ամենի հետևանքով զինված ուժերի ռազմական հզորությունը չհասցրեցինք բերել պլանավորված մակարդակին: Այսինքն` պատերազմը սկսվեց մեզ համար ոչ բարենպաստ պայմաններում»,– գրել է Գասպարյանը։
ՀՀ վարչապետ Նիկոլ Փաշինյանը հունիսի 27-ին քննիչ հանձնաժողովում հայտարարել էր, որ Հայաստանը սպառազինության և ռազմական տեխնիկայի պլանով չնախատեսված լրացուցիչ միջոցներ է ձեռք բերել։ Նա ընդգծել էր, որ սպառազինության և ռազմական տեխնիկայի (ՍՌՏ) պլանում փոփոխություն չի եղել, ընդհակառակը` ՀՀ–ն դրանով չնախատեսված լրացուցիչ ՀՕՊ միջոցներ է ձեռք բերել։ Պատճառն այն է եղել, որ պլանով նախատեսված ՀՕՊ միջոցները ձեռք բերելու ժամանակացույցի հետ կապված խնդիրներ կային։
Անդրադառնալով միայն պատերազմի ելքի վրա ազդած հիմնական գործոններին` ԶՈւ ԳՇ նախկին պետը շեշտել է, որ դրանցից են եղել աշխարհաքաղաքական ուժային կենտրոնների չեզոքությունը և անտարբերությունը և ըստ էության ագրեսիայի արդարացումն ու դրա հետևանքովՀՀ–ին քաղաքական աջակցության և ռազմական օգնության ցուցաբերման ձևական մոտեցումները։
Գասպարյանը նաև ընդգծել է, որ 44-օրյա պատերազմի հանգամանքները քննող հանձնաժողովին ներկայացրել է պաշտպանության հետ կապված համակարգային 11 հիմնախնդիր, որոնք պատճառ դարձան 2020թ.-ի 44-օրյա պատերազմում գրանցած անհաջողությունների համար, այդ թվում՝ Շուշիի ուղղությամբ վարած մարտական գործողությունների մասով։
Հիշեցնենք` ՀՀ վարչապետ Նիկոլ Փաշինյանը հունիսի 20-ին քննիչ հանձնաժողովի նիստում խոսեց պատերազմի ընթացքում կրակի դադարեցման վերաբերյալ Ադրբեջանի հետ ձեռք բերված պայմանավորվածությունների մասին, ասաց` երբ է իրականում ստորագրել հրադադարի վերաբերյալ եռակողմ հայտարարությունը, անդրադարձավ Արցախյան հարցի կարգավորման բանակցային գործընթացին` նշելով, որ Հայաստանի նախկին ղեկավարները բանակցելով Ադրբեջանին ժամանակ էին տվել պատրաստվելու «լավագույն պատերազմին», խոսեց այն մասին, թե արդյոք որևէ հնարավորություն կար Շուշին հայկական վերահսկողության ներքո պահել և այլն։
Հանձնաժողովի հաջորդ նիստում, որը կայացավ հունիսի 27-ին, Փաշինյանն ասաց, թե ինչու բանակցային գործընթացի փակուղու մասին չի խոսել 2018-2019թթ–ին, ինչպես կարելի էր կանգնեցնել պատերազմը։ Նա կրկին անդրադարձավ Շուշիի թեմային, խոսեց իր որդու ու կնոջ մասին և ասաց, թե ինչու պատերազմի ժամանակ Հայաստանը չճանաչեց Արցախի անկախությունը։ Փաշինյանը վստահեցրեց, որ Լելե Թեփեն վերադարձնելու թեմա 44–օրյա պատերազմի ընթացքում չի եղել, ինքն էլ զորահավաքը դադարեցնելու հրաման չի տվել։ ՀՀ վարչապետը նաև խոսեց պլանով չնախատեսված ՀՕՊ միջոցներ ձեռք բերելու մասին և պատմեց, թե ինչ են զեկուցել իրեն պատերազմից առաջ։