ԵՐԵՎԱՆ, 27 հունիսի – Sputnik. Հայկական կողմը 44–օրյա պատերազմի ընթացքում շատ դեպքերում զոհեր է ունեցել ոչ թե մարտի դաշտում, այլ տեղաշարժվելիս։ Այսօր ԱԺ–ում 44-օրյա պատերազմի հանգամանքները քննող հանձնաժողովի նիստում այս մասին ասաց ՀՀ վարչապետ Նիկոլ Փաշինյանը։
2020 թ–ի պատերազմը, ըստ Նիկոլ Փաշինյանի, ապացուցեց, որ հայկական բանակի շարժունակությունն ամենամեծ խնդիրներից մեկն է։
«Պատերազմի ընթացքում, իմ տեսակետից, ամենամեծ պրոբլեմն այն էր, որ մեր բանակը իր շարժվելու մեթոդների մեջ պրոբլեմ ուներ` մեծ մեքենաներ, մեծ խմբեր, մեծ տեսանելիություն...»,– հայտարարեց նա։
Նիկոլ Փաշինյանը չի ընդունում այն պնդումները, թե բանակը հենց այդպես էլ պետք է տեղաշարժվի։
Հիշեցնենք` Փաշինյանը հունիսի 20-ին քննիչ հանձնաժողովի նախորդ նիստում խոսել է պատերազմի ընթացքում կրակի դադարեցման վերաբերյալ Ադրբեջանի հետ ձեռք բերված պայմանավորվածությունների մասին, ասել` երբ է իրականում ստորագրել հրադադարի վերաբերյալ եռակողմ հայտարարությունը, անդրադարձել Արցախյան հարցի կարգավորման բանակցային գործընթացին` նշելով, որ Հայաստանի նախկին ղեկավարները բանակցելով Ադրբեջանին ժամանակ էին տվել պատրաստվելու «լավագույն պատերազմին»։ Փաշինյանը խոսել է նաև այն մասին, թե արդյոք որևէ հնարավորություն կար Շուշին հայկական վերահսկողության ներքո պահելու և այլն։