ԵՐԵՎԱՆ, 27 հունիսի – Sputnik. ՌԴ նախագահ Վլադիմիր Պուտինն այսօր Կրեմլում կդիմի պաշտպանության նախարարության, Ռոսգվարդիայի, անվտանգության դաշնային ծառայության, ներքին գործերի նախարարության և պահպանության դաշնային ծառայության ստորաբաժանումներին, որոնք հունիսի 24-ին մասնակցել են ապստամբության փորձի կասեցմանը: Տեղեկությունը լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։
Նա պարզաբանել է, որ պետության ղեկավարը որոշ զինծառայողների հետ առանձին կհանդիպի:
«Պուտինը Կրեմլում կդիմի այն ստորաբաժանումներին, որոնք ապստամբության ընթացքում կարգուկանոն և օրինականություն են ապահովել և մասնակցել են ապստամբության փորձի կասեցմանը: Նա կդիմի մեր զինվորներին», - ասել է Պեսկովը լրագրողներին։
Կրեմլի ներկայացուցիչն ընդգծել է, որ դա բավական կարևոր միջոցառում կլինի։
Հիշեցնենք` հունիսի 23–ի լույս 24–ի գիշերը «Վագներ» մասնավոր ռազմական կազմակերպության ուժերը Դոնի Ռոստովում գրավեցին Հարավային ռազմական օկրուգի շտաբը։ Դա տեղի ունեցավ Եվգենի Պրիգոժինի այն հայտարարության ֆոնին, թե իբր ՌԴ ԶՈւ–ն հրթիռառումբային հարվածներ է հասցրել «Վագների» ճամբարներին, ինչը հերքեց և՛ ՊՆ–ն, և՛ ԱԴԾ–ն։ Պրիգոժինի դեմ զինված ապստամբություն կազմակերպելու հոդվածով քրեական գործ հարուցվեց։
ՌԴ նախագահ Վլադիմիր Պուտինը ապստամբների գործողությունները որակեց հանցավոր արկածախնդրություն, հարված թիկունքից և դավաճանություն։
Ավելի ուշ Բելառուսի նախագահի մամուլի ծառայությունը հայտարարեց, որ Ալեքսանդր Լուկաշենկոն բանակցել է Պրիգոժինի հետ, և նա ընդունել է Ռուսաստանի տարածքում «Վագների» շարժը դադարեցնելու առաջարկը: Դրանից հետո ՌԴ նախագահի մամուլի քարտուղար Դմիտրի Պեսկովը հայտնեց, որ «Վագների» ղեկավարը կմեկնի Բելառուս, իսկ քրեական գործը կկարճվի։