ԵՐԵՎԱՆ, 26 հունիսի – Sputnik. «ՀայաՔվե» նախաձեռնության համակարգող Ավետիք Չալաբյանի պնդումը, թե Երևանի որոշ վարչական շրջանների ղեկավարները հրաժարվել են տարածքներ տրամադրել ստորագրահավաքի անցկացման համար, փաստերի խեղաթյուրում է։ Այս մասին հայտարարություն է տարածել Երևանի քաղաքապետարանի լրատվության վարչությունը։
Հայտնել ենք, որ այսօր նախաձեռնության անդամները իշխանություններին կոչ էին արել դադարեցնել ճնշումներն ու թույլ տալ, որ ստորագրահավաքն անխոչընդոտ իրականացվի։ Նրանք նշել էին, որ Երևանի 12 վարչական շրջաններից Ավան, Նոր Նորք, Կենտրոն, Նուբարաշեն և Աջափնյակ վարչական շրջաններից ստացել են մերժման նամակներ։ Ստորագրահավաքի անցկացման համար տարածք տրամադրելու հարցում նրանց մերժել են նաև Դիլիջան և Սպիտակ համայնքները։
«Վարչական շրջանների ներկայացուցիչները ոչ թե հրաժարվել են նախաձեռնությանը տարածքներ տրամադրել, այլ, մատնանշելով իրավասությունների տարանջատումը, առաջարկել են դիմել Երևանի քաղաքապետարան՝ համապատասխան թույտվություն ստանալու խնդրանքով»,– ասված է Երևանի քաղաքապետարանի հայտարարության մեջ։
Քաղաքապետարանում վստահություն են հայտնել, որ Ավետիք Չալաբյանը թյուրիմացաբար է այս առաջարկը գնահատել որպես մերժում:
Հիշեցնենք` հունիսի 20-ին հայտնի դարձավ, որ ՀՀ կենտրոնական ընտրական հանձնաժողովը բավարարել է «ՀայաՔվե» նախաձեռնության դիմումը` 50 հազար ստորագրություն հավաքելու և Ազգային ժողով օրենսդրական նախաձեռնություն ներկայացնելու համար։
Նախաձեռնության անդամները ցանկանում են հանրաքվեի միջոցով Լեռնային Ղարաբաղի ինքնորոշումից հրաժարվելու և Հայոց ցեղասպանության նշանակությունը նսեմացնելու համար օրենքով խիստ պատիժ նախատեսել։
Ստորագրահավաքի համար սահմանվել է 60-օրյա ժամկետ՝ 2023 թվականի հունիսի 21-ից օգոստոսի 19-ը։