ԵՐԵՎԱՆ, 26 հունիսի – Sputnik. ՀՀ կառավարությունն ԱԺ արտահերթ նիստ է հրավիրել հատուկ ընթացակարգով` մի շարք նախագծերի 1–ին ընթերցմամբ քննարկումները 24–ժամյա ռեժիմով անցկացնելու նպատակով։
Ինչպես ներկայացրեց ՀՀ արդարադատության նախարար Գրիգորի Մինասյանը նիստի մեկնարկին՝ նախատեսվող հրատապ նախագծերը հինգն են։
«Հանրակրթության մասին» օրենքում առաջարկվող փոփոխությունների նախագծով նախատեսվում է սահմանել հանրակրթական ուսումնական հաստատության տնօրենի պաշտոնի թափուր տեղի համար մրցույթի անցկացման մասնագիտական հանձնաժողովի կազմավորման և տնօրենի նշանակման կարգը։
Բացի այդ, կառավարությունն առաջարկում է «Քաղաքացիական դատավարության մասին» օրենսգրքում և հարակից օրենքներում փոփոխություններ կատարել, որով ընդհանուր իրավասության դատարանի ենթակա գումարի բռնագանձման փոքր քաղաքացիական գործերը կհանձնվեն նոտարների իրավասությանը։
«Նման գործերը կազմում են ընդհանուր իրավասության դատարանների ծանրաբեռնվածության շուրջ 80 տոկոսը։ Նախագծի ընդունման դեպքում էականորեն կբեռնաթափվի դատարանների ծանրաբեռնվածությունը, կբարձրանա փոքր հայցապահանջներով քաղաքացիական գործերի արտադատական լուծման արդյունավետությունը, կապահովվի քաղաքացիական գործերի ժամանակին և արագ լուծումը։ Փաթեթը ճանաչվել է անհետաձգելի կառավարության որոշմամբ»,– հայտարարեց Մինասյանը։
Կառավարությունն առաջարկում է նաև փոփոխել «Առանց ծնողական խնամքի մնացած երեխաների սոցիալական պաշտպանության մասին», «Պաշտոնատար անձանց գործունեության ապահովման, սպասարկման և սոցիալական երաշխիքների մասին» և «Ճանապարհային երթևեկության անվտանգության ապահովման մասին» օրենքները։