ԵՐԵՎԱՆ, 26 հունիսի – Sputnik. «Ռոսսոտրուդնիչեստվոյի» ղեկավար Եվգենի Պրիմակովը կարևորում է կազմակերպության ռեսուրսները մերձավոր արտասահմանյան երկրներ տեղափոխելը: Նրա կարծիքով՝ դրանք Ռուսաստանի համար շատ ավելի առաջնային են, քան արևմտյան երկրները։ Այս մասին Պրիմակովը հայտարարել է «Sputnik на русском» - ին տված բացառիկ հարցազրույցում։
«Եթե մենք կորցնենք ազդեցությունը Լյուքսեմբուրգում, իհարկե, դա տհաճ կլինի, բայց եթե կորցնենք ազդեցությունը Հայաստանում, դա աղետ կլինի»,- ասաց նա։
Այս համատեքստում Պրիմակովը նշել է, որ մերձավոր արտերկրի երկրներում «Ռոսսոտրուդնիչեստվոյի» ներկայացուցչություններում ավելացել է աշխատակիցների թիվը։ Ավելացել է նաև ռուսաց լեզվի դասընթացների թիվը։ Նրա խոսքով ՝ լսարանները լեփ-լեցուն են, քանի որ մարդիկ ցանկանում են լեզու սովորել։
Պրիմակովը հավելել է, որ «Ռոսսոտրուդնիչեստվոյի» հայաստանյան ներկայացուցչությունն իրականացրել է շատ լավ նախագիծ, որը երեխաներին բացատրում է, թե որքան լավ է ռուսերեն խոսելը։
Բացի այդ, սահմանամերձ Կապանում բացվել է Երևանի Ռուսական տան կոնտակտային կենտրոնը։
Պրիմակովը կարծում է, որ մերձավոր արտասահմանի երկրներում անհրաժեշտ է հիշեցնել Ռուսաստանի դերը և դրա մասին պատմել երիտասարդներին, ինչպես նաև պետք է մեծացնել ռուսական բուհերում կրթության գրավչությունը։
Նրա խոսքով` ամբողջ աշխարհի ռուսական բուհերում կրթության քվոտաները կազմում են 30 հազար տեղ, 7424-ը՝ մերձավոր արտասահմանի երկրների ուսանողների համար: Նա համոզված է, որ այդ տեղերն աստիճանաբար կավելանան։
Պրիմակովը նշել է, որ Ռուսաստանում սովորում է Բելառուսից 1300 ուսանող, Ղրղզստանից և Տաջիկստանից՝ մոտ 1000, Ղազախստանից և Ուզբեկստանից՝ 800, Ադրբեջանից՝ 270, Հայաստանից՝ 250։