ԵՐԵՎԱՆ, 26 հունիսի – Sputnik. Ադրբեջանը Լեռնային Ղարաբաղի բնակիչների հետ չի կարող անել ինչ ուզում է։ Այս մասին ասել է ԵԽԽՎ ղեկավար Թինի Քոքսը, հաղորդում է կազմակերպության մամուլի ծառայությունը։
«Բոլորը գիտակցում են, որ Լեռնային Ղարաբաղը գտնվում է Ադրբեջանի տարածքում: Այն անկլավ է, որտեղ մեծ թվով հայ բնակչություն կա: Բայց դա Ադրբեջանի ղեկավարությանը իրավունք չի տալիս այդ քաղաքացիների հետ անել ինչ ուզում է: Եվ Լաչինի միջանցքի շրջափակումը կարող է հանգեցնել հսկայական աղետի հազարավոր մարդկանց համար, որոնք կախված են Հայաստանի հետ այս միջանցքից»,- ասաց Քոքսը։
Միջանցքը փակ է, և դրանով Ադրբեջանը խախտում է իր պարտավորությունները։ Ուստի ԵԽԽՎ-ն վճռականորեն պահանջել է Բաքվից կատարել իր պարտավորությունները և անհապաղ բացել միջանցքը։
Հիշեցնենք` հունիսի 15-ի առավոտյան՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով։ Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման փորձը կանխվել է։
Հակարիի կամրջի մոտ տեղի ունեցած ադրբեջանական սադրանքից հետո Քաշաթաղի (Լաչինի) միջանցքով բոլոր հումանիտար ուղևորափոխադրումներն ու բեռնափոխադրումները արգելվել են Ադրբեջանի կողմից:
Լաչինի միջանցքով տեղաշարժը խաթարված է 2022–ի դեկտեմբերի 12–ից։