ԵՐԵՎԱՆ, 25 հունիսի – Sputnik. «Վագներ» ՄՌԿ-ի ռազմական տեխնիկան Դոնի Ռոստովում ավելի քան 10 հազար քառակուսի մետր ճանապարհ է վնասել։ Տեղեկությունը հայտնել է քաղաքապետ Ալեքսեյ Լոգվինենկոն։ Նրա խոսքերը մեջբերում է ՌԻԱ Նովոստին։
Քաղաքապետի խոսքով՝ այսօր առավոտյան կոմունալ ծառայությունները կարգուկանոն են հաստատել Դոնի Ռոստովի Հարավային ռազմական օկրուգի շտաբի մոտ, մաքրել կրկեսի մոտի ու Դոնի Ռոստովի կենտրոնական փողոցների աղբը:
«Նախնական տվյալներով՝ վնասվել է ավելի քան 10 հազար քառակուսի մետր ճանապարհ։ Ամենից շատ տուժել է Բուդյոնովսկի պողոտան», - հայտնել է Լոգվինենկոն։
Նա նշել է, որ կոմունալ ծառայողներն այսօր ձեռնամուխ կլինեն ճանապարհների վերանորոգմանը, աշխատանքները նախատեսվում է իրականացնել երկու օրում:
Հիշեցնենք` Դոնի Ռոստովում հունիսի 23–ի լույս 24–ի գիշերը «Վագներ» ՄՌԿ–ի ուժերը գրավել էին Հարավային ռազմական օկրուգի շտաբը։ Քաղաքում զինված մարդկանց խմբեր էին տեղաշարժվում, քաղաքի ելումուտը վերահսկվում էր հսկիչ կետերով։ Այս ամենը տեղի է ունեցել Եվգենի Պրիգոժինի հայտարարության ֆոնին։ Նա ասել էր, իբր ՌԴ ԶՈւ–ն հրթիռա–ռումբային հարվածներ է հասցրել «Վագների» ճամբարներին, ինչը հերքել է և՛ ՊՆ–ն, և՛ ԱԴԾ–ն։ Պրիգոժինի դեմ զինված ապստամբություն կազմակերպելու վերաբերյալ քրեական գործ է հարուցվել։
ՌԴ նախագահ Վլադիմիր Պուտինը ապստամբների գործողությունները որակել էր հանցավոր արկածախնդրություն, հարված Ռուսաստանի մեջքին և դավաճանություն, որին հանգեցրել են մեծ հավակնություններն ու անձնական շահերը։
Մոսկվայի, Մոսկվայի և Վորոնեժի մարզերի տարածքներում հնարավոր ահաբեկչությունները կանխելու նպատակով հակաահաբեկչական գործողությունների ռեժիմ էր սահմանվել։