ԵՐԵՎԱՆ, 24 հունիսի – Sputnik. «Հայաստան» համահայկական հիմնադրամը 2022 թվականին ընդհանուր առմամբ իրականացրել է 17 մլրդ 600 մլն դրամի ավելի քան 40 լայնածավալ ծրագիր։ Այս մասին «Հայաստան» համահայկական հիմնադրամի հոգաբարձուների խորհրդի 33-րդ նիստին ասաց հիմնադրամի գործադիր տնօրեն Հայկակ Արշամյանը` ներկայացնելով հիմնադրամի տարեկան ֆինանսական հաշվետվությունը։
«Այդ ծրագրի մի մասը երկարաժամկետ շարունակական ծրագրեր էին, ու դրանց մեծ մասն ավարտվել է, մյուսներն էլ այս տարի ավարտին կհասցվեն։ Հիմնադրամի բարեգործական ծրագրերն ուղղված են բնակարանաշինությանը (11.2 մլրդ դրամ), առողջապահությանը (286 մլն դրամ), կրթությանը (521 մլն դրամ), ճանապարհաշինությանը (4.3 մլրդ դրամ), վերականգնվող էներգիային (112 մլն դրամ), ջրամատակարարմանը (574 մլն դրամ), սոցիալական աջակցությանը (203.5 մլն դրամ), մշակութային ծրագրերին (123 մլն դրամ) և այլն։
Ընդ որում, միայն Արցախում իրականացվել է դրանից շուրջ 15 մլրդ դրամի ծրագիր` բնակարանաշինության համար ծախսվել է 10.3 մլրդ դրամ, ճանապարհաշինության համար`4.3 մլրդ դրամ, իսկ ջրամատակարարման ծրագրերին ուղղվել է 360 մլն դրամ։