ԵՐԵՎԱՆ, 23 հունիսի - Sputnik. Նորք–Մարաշ թաղամասում 5 տարի է՝ աղբահանություն չի կատարվում, փողոցները չեն մաքրվում, ոռոգում չկա, փողոցի կեսը լուսավորված է, մյուս կեսը`ոչ, չնայած թափառող շների ականջին առկա կնիքներին՝ շարունակում են բազմանալ։ Թաղամասի խնդիրների վերաբերյալ ԱԺ–ում «Մարդու իրավունքների պաշտպանությունը Երևանի քաղաքապետարանի գործունեության համատեքստում» խորագրով աշխատանքային քննարկման ժամանակ տեղեկացրեց Հայաստանի գործատուների հանրապետական միության նախագահ Գագիկ Մակարյանը։
Քննարկումը նախաձեռնվել է Ազգային ժողով-քաղաքացիական հասարակություն համագործակցության շրջանակում։
«40-ից ավելի ընտանիքներ 500 մետր տանում և աղբը թափում են ձեռքով։ Նախկին քաղաքապետը ասում էր, որ աղբարկղի հեռավորությունը մաքսիմալ 100 մետր է, մեզ մոտ` Նորք–Մարաշում, 500 մետր հեռու է։ Պատճառաբանվում է, որ մեքենաներ չեն մտնում»,–ասաց Մակարյանը։
Թաղամասի վերոնշյալ խնդիրներով նա դիմել է Նորք–Մարաշի թաղապետ Միքայել Օհանյանին, որն ի պատասխան նշել է, որ խնդիրների պատասխանները տրված են քաղաքապետարանի կայքէջում։
«Ես որոշել եմ մի օր գնալ թաղապետի կաբինետում նստել, ասել համակարգիչդ բացի ու ցույց տուր պատասխանները»,–նշեց նա։
Մակարյանն այս համատեքստում ընդգծեց, որ շատ պետական մարմիններում չկա արժանի վերաբերմունք հարկատուի նկատմամբ, և նույն պաշտոնյաները մոռանում են, որ պարտավոր են ծառայությունները որակով և ժամանակին մատուցել, քանի որ կաբինետները, որտեղ գեղեցիկ կահավորված նստած են, հարկատուների հաշվին է։