ԵՐԵՎԱՆ, 22 հունիսի – Sputnik. Ուկրաինայի զինված ուժերն այս գիշեր հարվածներ են հասցրել Ղրիմն ու Խերսոնի մարզը միացնող Չոնգարի կամրջին: ՏԱՍՍ-ը տեղեկացնում է, որ այս մասին հայտնել է հանրապետության ղեկավար Սերգեյ Ակսյոնովը։
Հարձակման հետևանքով ոչ ոք չի տուժել։ Այս պահին մասնագետները փորձաքննություն են անցկացնում զինամթերքի տեսակը գնահատելու համար։ Միաժամանակ համապատասխան ծառայությունները զննում են ճանապարհը։
Ղրիմի ղեկավարի խորհրդական Օլեգ Կրյուչկովն իր հերթին նշել է, որ նոր տարածաշրջաններով ցամաքային միջանցքի աշխատանքը չի խաթարվել:
«Ղրիմը Խերսոնի շրջանի հետ երեք անցակետ է կապում, երկուսը` Արմյանսկի շրջանում, մեկը` Ջանկոյի շրջանում։ Դրանցից մեկի աշխատանքի խափանումը չի կարող արմատապես խախտել ցամաքային տրանսպորտային միջանցքի տրանսպորտային լոգիստիկան։ Մինչ ընթանում է Չոնգարի կամրջի կոնստրուկցիաների հետազոտությունը, խնդրում ենք Զապորոժիեի և Խերսոնի մարզեր մեկնելիս ընտրել Արմյանսկ քաղաքով անցնող երթուղին», - ասել է Կրյուչկովը։
Խերսոնի մարզպետի ժամանակավոր պաշտոնակատար Վլադիմիր Սալդոն հայտնել է, որ Խերսոնի մարզի ու Ղրիմի միջև վարչական սահմանի կամուրջներին հարվածելու համար Ուկրաինայի զինված ուժերը, նախնական տվյալներով, կիրառել են բրիտանական «Storm Shadow» հրթիռներ: