ԵՐԵՎԱՆ, 22 հունիսի – Sputnik. ՀՀ–ում Իրանի արտակարգ և լիազոր դեսպան Աբբաս Բադախշան Զոհուրին, որն ավարտում է դիվանագիտական առաքելությունը Հայաստանում, գոհ է ՀՀ տարածքային կառավարման և ենթակառուցվածքների նախարարության հետ գործակցությունից։ Նա այդ մասին ասել է Գնել Սանոսյանի հետ հանդիպմանը։
«Դեսպանը գոհունակություն է հայտնել ՏԿԵ նախարարության հետ տարբեր ոլորտներում փոխգործակցության, արձանագրված արդյունքների համար, և հավաստիացրել, որ հաջորդիվ էլ հետամուտ են լինելու բոլոր ծրագրերի իրականացման հարցում»,– գրել է Սանոսյանը ֆեյսբուքյան էջում։
Նախարարը կարևորել է դեսպանի ջանքերը հայ-իրանական բարեկամական հարաբերությունների սերտացման ուղղությամբ և հաջողություններ մաղթել հետագա աշխատանքում։
Հանդիպմանը քննարկվել է նաև համատեղ իրականացվող ծրագրերի ընթացքը։
Հիշեցնենք` Աբբաս Բադախշան Զոհուրին ՀՀ–ում Իրանի դեսպան է նշանակվել 2019 թվականին, Հայաստանում դիվանագիտական ծառայությունը սկսել 2020-ի սկզբին: Նրան շուտով այդ պաշտոնում կփոխարինի Սիրիայում Իրանի դեսպան Մեհդի Սոբհանին։