ԵՐԵՎԱՆ, 22 հունիսի – Sputnik. ՀՀ սահմանադրական փոփոխությունների նախագծի հայեցակարգը նախատեսվում է ունենալ արդեն այս տարվա վերջին։ Այս մասին կառավարության նիստից հետո ճեպազրույցում ասաց ՀՀ արդարադատության նախարար Գրիգոր Մինասյանը։
«Մենք այժմ ապահովում ենք մասնակցայնություն, այսինքն` ի տարբերություն նախորդ նման պրոցեսների, գործադիրը չէ, որ որոշում է տեմպը, օրակարգը։ Աշխատանքը տարվում է հասարակական կազմակերպությունների և քաղաքական թիմերի հետ, տեմպն էլ հենց դրանով է պայմանավորված»,– ասաց Մինասյանը։
Հիշեցնենք` Սահմանադրության 2015 թվականի փոփոխությունների արդյունքում սահմանված կարգով 2018 թվականի ապրիլի 9-ից՝ ՀՀ նախագահ Արմեն Սարգսյանի պաշտոնը ստանձնելու օրվանից, Հայաստանի Հանրապետությունը կիսանախագահական կառավարման ձևից անցել է խորհրդարանական կառավարման ձևի: Դրանից հետո ՀՀ վարչապետ Նիկոլ Փաշինյանը Հանրապետության հրապարակում կազմակերպած հանրահավաքի ժամանակ հայտարարել էր, որ Հայաստանում կանցկացվի սահմանադրական հանրաքվե, որով Հայաստանը կանցնի կիսանախագահական կառավարման համակարգի։
Սակայն 2022–ին` Սահմանադրության օրը, Փաշինյանը հայտարարել էր, թե Հայաստանը պիտի շարունակի պահպանել կառավարման խորհրդարանական համակարգը, որովհետև 2021 թվականի իրադարձություններն ապացուցեցին, որ այս համակարգը ճգնաժամեր կառավարելու, քաղաքական բանավեճին ժողովրդի ներգրավման ու վճռական մասնակցության ավելի գործուն մեխանիզմներ է ապահովում։