ԵՐԵՎԱՆ, 21 հունիսի – Sputnik. Խորվաթիայում կործանվել է Հունգարիայի ռազմաօդային ուժերի «Airbus H145» ուղղաթիռը, որում երեք մարդ է եղել։ Տեղեկությունը հայտնում է Հունգարիայի պաշտպանական գերատեսչությունը։
«Հունգարիայի ռազմաօդային ուժերի երկու «Airbus H145» ուղղաթիռները ուսումնական առաջադրանքներ են կատարել Խորվաթիայի օդային տարածքում, երբ երեք մարդ տեղափոխող ուղղաթիռներից մեկը չպարզված հանգամանքներում կործանվել է Խորվաթիայի կենտրոնական մասում», - նշված է նախարարության կայքում հրապարակված հայտարարության մեջ:
Գերատեսչությունից նշել են, որ ուղղաթիռի բեկորներն ու երկու զինվորականների մարմինները հայտնաբերվել են, երրորդի որոնումները շարունակվում են:
Ավելի վաղ խորվաթական ԶԼՄ-ները հայտնել էին, որ ռազմական ուղղաթիռն ընկել է Շիբենսկո-Կնինսկայա ժուպանիայի (օկրուգ) Պակովո շրջանում: Որոնումների համար ուղարկվել են «Մի-171» ուղղաթիռ և «Pilatus» ինքնաթիռ։