ԵՐԵՎԱՆ, 20 հունիսի – Sputnik. ՀՀ քաղաքական ղեկավարության մոտ հասունացել է համոզմունքը, որ ՀԱՊԿ-ը` լավ, թե վատ` պաշտպանիչ վահան է Հայաստանի համար։ Sputnik Արմենիայի եթերում նման կարծիք հայտնեց Երևանի պետական համալսարանի միջազգային հարաբերությունների ու դիվանագիտության ամբիոնի դոցենտ Գրիգոր Բալասանյանը` մեկնաբանելով ՀՀ ԱԳ նախարար Արարատ Միրզոյանի այցը Բելառուս։
Նշենք, որ ՀՀ արտաքին գործերի նախարարը մասնակցում է Հավաքական անվտանգության պայմանագրի կազմակերպության (ՀԱՊԿ) արտաքին գործերի նախարարների խորհրդի նիստին։
«Երևի քաղաքական խորհրդակցությունների արդյունքում Հայաստանի իշխանությունները որոշել են բարելավել ՀԱՊԿ-ի հետ լարված հարաբերությունները»,– ասաց նա։
ՀՀ իշխանությունների կողմից դիրքորոշման նման փոփոխությունը փորձագետը կապում է նախևառաջ աշխարհաքաղաքական պատճառների հետ։
«Կարծում եմ` աշխարհաքաղաքական վիճակը ստիպել է մի փոքր սթափվել և հասկանալ, որ ՀԱՊԿ–ը ամեն դեպքում մեր ռազմաքաղաքական դաշնակիցն է։ Իսկ այս տարածաշրջանը դառնում է ավելի վտանգավոր և հեղհեղուկ։ Եվ ես ուրախ եմ, որ ՀՀ քաղաքական ղեկավարության մոտ միգուցե եկել և հասունացել է այն համոզմունքը, որ ՀԱՊԿ–ի հետ, այո, կան խնդիրներ, բայց այդ կառույցը լավ թե վատ պաշտպանիչ վահան է Հայաստանի համար»,–ասաց Բալասանյանը։
Գրիգոր Բալասանյանը չի բացառում, որ շուտով հայ-ադրբեջանական սահմանին կլինի նաև ՀԱՊԿ խաղաղապահ զորագունդ։ Ավելին, ըստ նրա, Արարատ Միրզոյանի այցը դրա նախապատրաստումն է։
«Հաստատ միտում կա թուլացնելու լարվածությունը ՀԱՊԿ-ի հետ, այլապես արտգործնախարարի փոխարեն կգնար փոխարտգործնախարարը»,– նշեց նա։
Ավելի վաղ հայտնել էինք, որ ՀՀ պաշտպանության նախարար Սուրեն Պապիկյանը հրաժարվել էր մասնակցել Բելառուսի մայրաքաղաք Մինսկում կայացած Հավաքական անվտանգության պայմանագրի կազմակերպության (ՀԱՊԿ) անդամ երկրների պաշտպանության նախարարների նիստին։
Գրիգոր Բալասանյանը համոզված է, որ քանի դեռ Հայաստանը ՀԱՊԿ-ի անդամ է, հակառակորդը մեր դեմ ոտնձգություն անելուց առաջ կմտածի, քանի որ Ուկրաինայում տեղի ունեցող իրադարձությունների ֆոնին ՀԱՊԿ-ի հեղինակությունը գնալով բարձրանում է։
Բալասանյանն ընդգծում է, որ Ռուսաստանն էլ իր հերթին հասկանում է, որ ՀՀ–ում իրավիճակի պայթելը կնշանակի ՌԴ–ի համար խնդիրներ Հարավային Կովկասում, 102–րդ ռամզաբազայի դուրսբերումը կնշանակի փոխարինում թուրքական բազայով։ Դրա համար ՀԱՊԿ–ը սկսել է մի փոքր «փափուկ ուժ» կիրառել և հարցերը լուծել բանակցությունների միջոցով պայմանավորվելով։
Վերջին շրջանում, միջազգայնագետի դիտարկմամբ, փոփոխություններ են նկատվում նաև ՀԱՊԿ անդամ երկրների հռետորաբանությունում, մասնավորապես Բելառուսի նախագահ Ալեքսանդր Լուկաշենկոյի։ Վերջինս հիմնավորված է համարել Հայաստանի դժգոհությունները ՀԱՊԿ աշխատանքների հետ կապված։ Սա իհարկե չի կարելի համարել պրոհայկական հայտարարություն, սակայն միանշանակ այս հայտարարությունը բնորոշ չէր Լուկաշենկոյին։
Ինչ վերաբերում է դժգոհություններին, փորձագետը ընդգծում է` դժգոհությունները երկուստեք են, և չի բացառվում, որ ՀՀ–ն իր դիվանագիտական խողովակներով դեսպանների մակարդակով կարողացել է հասցնել ՀԱՊԿ–ին հայկական կողմի դժգոհությունների հիմնական պատճառը, ինչը նաև ՀԱՊԿ–ում է նորմալ ընկալվել։
Հիշեցնենք, որ ապրիլի 20-ին ՀՀ վարչապետ Նիկոլ Փաշինյանը խորհրդարանում լրագրողներին ասել էր, որ Հայաստանը պատրաստ է ՀԱՊԿ առաքելության տեղակայմանը, սակայն այդ ուղղությամբ քննարկումները շարունակվում են: ՀՀ ԱԳ նախարար Արարատ Միրզոյանը մարտի 20-ին Մոսկվայում ռուս գործընկերոջ հետ համատեղ մամուլի ասուլիսի ժամանակ նաև նշել է, որ ՀԱՊԿ առաքելություն ուղարկելու որոշման նախագիծը սեղանին է, դրա վրա աշխատանքները շարունակվում են: Միևնույն ժամանակ, Երևանը գործընկերներից ակնկալում է քաղաքական գնահատական՝ կապված Ադրբեջանի՝ 2022 թ. սեպտեմբերյան ագրեսիայի հետ։