ԵՐԵՎԱՆ, 20 հունիսի – Sputnik. 10 ֆուտբոլիստներ ավարտում են իրենց ելույթները «Արարատի» կազմում։ Տեղեկությունը հայտնում է ֆուտբոլային ակումբի մամուլի ծառայությունը։
«2022/23 մրցաշրջանի ավարտից հետո «Արարատի» կազմում իրենց ելույթներն ավարտում են դարպասապահներ Սերգեյ Ռևյակինն ու Գոռ Մանուկյանը, պաշտպաններ Հայկ Իշխանյանը, Հովհաննես Նազարյանը, Վարդան Արզոյանը, Դուշան Միհիչը, Թեդի Մեզագը, կիսապաշտպաններ Արմանդ Դագրուն և Զիլե Տիհիդիեն, հարձակվող Ամարա Տրաորեն»,– ասված է հաղորդագրությունում:
Սերգեյ Ռևյակինը 2019/20 և 2022/23 մրցաշրջաններում է հանդես եկել «Արարատում»՝ ընդհանուր առմամբ անցկացնելով 33 հանդիպում:
Գոռ Մանուկյանը «Արարատի» կազմում մասնակցել է Հայաստանի Պրեմիեր լիգայի վեց հանդիպման:
Հայկ Իշխանյանը նախորդ մրցաշրջանի մեկնարկում էր միացել «Արարատին» և թիմի կազմում մասնակցել է Պրեմիեր լիգայի 26 հանդիպման։
Դուշան Միհիչը «Արարատի» կազմում անցկացրել է 15 խաղ և դարձել է 2 գոլի հեղինակ։
33-ամյա Թեդի Մեզագը թիմի կազմում մասնակցել է 9 խաղի և դարձել է 1 գոլի հեղինակ:
Հովհաննես Նազարյանը երկու մրցաշրջան է անցկացրել «Արարատի» կազմում՝ ընդհանուր առմամբ մասնակցելով 26 խաղի և դառնալով մեկ գոլի հեղինակ։
Վարդան Արզոյանը 2022/23 մրցաշրջանում 9 անգամ է խաղադաշտ դուրս եկել «Արարատի» մարզաշապիկով, իսկ ընդհանուր առմամբ նա «Արարատի» կազմում մասնակցել է Պրեմիեր լիգայի 80 խաղի և դարձել մեկ գոլի հեղինակ:
Արմանդ Դագրուն երկու մրցաշրջանում «Արարատի» կազմում անցկացրել է 27 խաղ և դարձել է 1 գոլի հեղինակ:
Զիլե Տիհիդեն «Արարատի» կազմում 11 խաղ է անցկացրել, իսկ Ամարա Տրաորեն մասնակցել է 27 խաղի և դարձել է 3 գոլի հեղինակ:
«Արարատ» ֆուտբոլային ակումբը շնորհակալություն է հայտնում ֆուտբոլիստներին կատարած պրոֆեսիոնալ աշխատանքի համար և հետագա հաջողություններ է մաղթում: