Ով կամ ինչը օգնեց հաղթել Ուելսին. «նախկինները»` Հայաստանի հավաքականի խաղի մասին

«Չանչարևիչը նախևառաջ լավ դարպասապահ է։ Ճիշտ է` նրան պակասում է կայունությունը, բայց հավաքականի կազմում նա լավ հանդիպում անցկացրեց։ Եղան դրվագներ, երբ Օգնենը ոչ այնքան վստահ դուրս եկավ դարպասից, ինչը վտանգավոր էր, քանի ու Քիֆեր Մուրը բարձրահասակ ֆուտբոլիստ է ու կարող էր օգտագործել այդ գործոնը։ Բայց Չանչարևիչը հենց Մուրին կարողացավ ինչ–որ տեղ սադրել, ու մրցակիցը կարմիր քարտ ստացավ։ Բացի այդ, գծի վրա նա շատ վստահ էր գործում, ու եղան դրվագներ, երբ պաշտպանների հետ հանգիստ խաղարկում էր գնդակը պաշտպանությունից դուրս գալու համար»,– ասաց Կասպարովը։

«Ակնհայտ էր, որ մենք խնդիրներ ունենք պաշտպանությունում։ Եղան դիրքային սխալներ։ Բայց խաղից առաջ էլ պարզ էր, որ խաղային այս օղակում մի քանի ֆուտբոլիստների բացակայությունն իր ազդեցությունը պարզապես չէր կարող չունենալ։ Նաիր Տիկնիզյանն ու Արտակ Դաշյանը ամեն ինչ արեցին իրենց եզրերում սպառնալիքները չեզոքացնելու համար։ Նրանք մեծ ծավալի աշխատանք կատարեցին, ու չմոռանանք, որ նաև միանում էին գրոհներին»,– ասաց Սուքիասյանը։

«Հայաստանի հավաքականի կիսապաշտպանությունը Ուելսի հետ շատ լավ հանդիպում անցկացրեց։ Մեր ֆուտբոլիստներն աչքի ընկան իրենց վստահ ու թիմային խաղով, բացի այդ էլ ֆիզիկապես էին շատ լավ պատրաստ։ Հանդիպման ընթացքում մի քանի անգամ հարձակման գծի ֆուտբոլիստների հետ պրեսինգի դիմելով` գնդակ էին խլում ու սպառնում մրցակցի դարպասին։ Լատերալները՝ Տիկնիզյանն ու Դաշյանն էլ իրենց բարձրության վրա էին։ Հիանալի հանդիպում անցկացրեց Իվու Ուգուչուկվոն»,– ասաց Տոնոյանը։

«Հայաստանի հավաքականը հարձակման գծի գնահատականը կարճ կասեմ՝ գերազանց։ Եթե ավելի մանրամասնենք, ապա պարզ է, որ մեր ներկայիս հավաքականի ֆուտբոլիստները դեռևս խաղակցվածության խնդիր ունեն։ Ֆուտբոլը թիմային խաղ է, ու եթե ֆուտբոլիստները գործում են իրար շատ լավ հասկանալով, դա արդեն լրիվ այլ արդյունք է ապահովում։ Շատ կարևոր էր, որ Հրանտ-Լեոն Ռանոսն ու Լուկաս Սելարայանը իրենց անհատական վարպետությամբ նույնպես աչքի ընկան։ Ճիշտ է` երկուսի խփած գոլերն էլ գերազանց փոխանցումներից հետո գրանցվեցին, բայց մեր հարձակվողները կարողացան իրենց շանսը իրացնել վարպետորեն, դրսևորելով կատարողական բարձր կարգ»,– ասաց Շահգելդյանը։