Հրապարակվել է Հայաստանի հավաքականի վերջնական հայտացուցակը Ուելսի դեմ խաղում

ԵՐԵՎԱՆ, 16 հունիսի – Sputnik. Հայաստանի ֆուտբոլի ֆեդերացիան հրապարակել է Հայաստանի ազգային հավաքականի վերջնական հայտացուցակն Ուելսի դեմ խաղում։

Ցանկից պարզ է դառնում, որ մեր թիմը կորուստներով է մոտենում Եվրո-2024-ի ընտրական խաղին։

Հովհաննես Համբարձումյանը վնասվածքի պատճառով (ոտքի կոտրվածքից հետո դեռևս չի ապաքինվել) չի հրավիրվել հավաքական։ Մինչև Քարդիֆ մեկնելը մեր հավաքականի ճամբարից վնասվածքի պատճառով հեռացան Խորեն Բայրամյանն ու Տարոն Ոսկանյանը։

Թեև Կամո Հովհաննիսյանը մեկնել էր մրցավայր, բայց նա նույնպես հայտավորված չէ այս մրցավեճին։ Պատճառը նորից վնասվածքն է։

Հարցականի տակ է նաև թիմի ավագ Վարազդատ Հարոյանի մասնակցությունը, բայց նա հայտավորված է խաղին ու կարող է դուրս գալ խաղադաշտ։

Հիշեցնենք` Եվրոպայի 2024 թվականի առաջնության որակավորման փուլի Ուելս-Հայաստան խաղը կկայանա հունիսի 16-ին:

Ընտրական խմբում Հայաստանի հավաքականը դեռևս միավոր չունի։ Մեր ընտրանին մեկ հանդիպում է անցկացրել, ու սեփական հարկի տակ զիջել Թուրքիայի հավաքականին 1։2 հաշվով։ Ուելսի ընտրանին երկու խաղ է անցկացրել և ունի 4 միավոր։ Հայաստանի հավաքականն այսօր Ուելսի հավաքականի հետ մրցելու է առաջին անգամ։