ԵՐԵՎԱՆ, 16 հունիսի – Sputnik. Հայոց եկեղեցին պիտի շարունակի ջանքեր գործադրել՝ համազգային ներուժի համախմբմամբ հայրենիքը փորձություններից դուրս բերելու և ապագայի հանդեպ հույսն ու լավատեսությունն ամրապնդելու համար։ Այսօր «Մայր Հայաստան» ժողովրդական շարժման նախաձեռնող խմբի անդամների հետ հանդիպման ժամանակ ասել է Ամենայն հայոց կաթողիկոս Գարեգին Երկրորդը։
Մայր աթոռի տեղեկատվական կենտրոնը հայտնում է, որ շարժման համակարգող Անդրանիկ Թևանյանը ներկայացրել է շարժման ձևավորման պատճառները, Հայաստանի ու Արցախի առջև ծառացած արտաքին և ներքին մարտահրավերների հաղթահարման ուղիների վերաբերյալ տեսլականը։
«Այնուհետև ներկաներին իր հայրական օրհնությունը բերեց Ամենայն հայոց կաթողիկոսը՝ առկա հիմնախնդիրների դիմագրավման գործում կարևորելով ազգային միասնությունն ու միաբանությունը։ Նորին Սրբությունը նման նախաձեռնությունները նկատեց երկրում տիրող իրավիճակի շուրջ խոր անհանգստությունների և մտահոգության ուղղակի արտահայտությունը»,– նշված է հաղորդագրության մեջ։
Անդրադարձ է կատարվել Հայաստանի և Արցախի անվտանգային խնդիրներին, հասարակության բարոյահոգեբանական վիճակին, եկեղեցի-պետություն հարաբերություններին, Արցախին վերաբերող հարցերին։