ԵՐԵՎԱՆ, 16 հունիսի – Sputnik. Հայաստանն ու Ռուսաստանը Սանկտ Պետերբուրգի միջազգային տնտեսական համաժողովի ընթացքում ստորագրել են զբոսաշրջության զարգացման ճանապարհային քարտեզ:
Զբոսաշրջության զարգացման ճանապարհային քարտեզի ստորագրումը
© Sputnik / Светлана Шевченко
Փաստաթղթի տակ ստորագրել են ՌԴ տնտեսական զարգացման փոխնախարար Դմիտրի Վախրուկովը և ՀՀ էկոնոմիկայի փոխնախարար Նարեկ Տերյանը:
«Զբոսաշրջությունը Հայաստանի տնտեսության կարևոր ուղղություններից է։ Այս պահին Հայաստանի զբոսաշրջիկների ավելի քան 50%-ը ՌԴ-ից է։ Ձեզանից շատերը, հավանաբար, եղել են Հայաստանում։ Ուզում եմ նշել, որ Հայաստանը միայն եկեղեցիներ և բնապատկերներ չէ։ Մեզ մոտ բացվել է 2 նոր լեռնադահուկային հանգստավայր, երրորդը կառուցվում է, զարգանում է առագաստանավային սպորտը և այլն», - ասել է Տերյանը։
Նա համաժողովի մասնակիցներին հրավիրել է Հայաստան ինչպես գեղեցիկ բնապատկերները վայելելու, այնպես էլ ակտիվ սպորտով զբաղվելու համար:
2023 թվականի հունվար-մայիսին դեպի Հայաստան զբոսաշրջային հոսքը 2022 թվականի նույն ժամանակահատվածի համեմատ կրկնապատկվել է։ Եթե նախորդ տարվա հինգ ամիսներին Հայաստան է այցելել 464 հազար զբոսաշրջիկ, ապա այս տարի արդեն, այդ թիվը եղել է 806 հազար։ Միայն մայիսի ցուցանիշները գերազանցում են նախորդ տարվա նույն ժամանակահատվածի ցուցանիշը 70 հազար մարդով։