ԵՐԵՎԱՆ, 15 հունիսի – Sputnik. Հայաստանի ֆուտբոլի հավաքականը պայքարելու է Եվրոպայի 2024 թվականի առաջնության ուղեգիր վաստակելու համար։ Այս մասին Ուելս – Հայաստան խաղից առաջ Քարդիֆում կայացած նախախաղային ասուլիսում ասաց Հայաստանի հավաքականի մարզիչ Ալեքսանդր Պետրակով։
Ֆուտբոլի Եվրոպայի 2024 թվականի ընտրական D խմբում Հայաստանի հավաքականը հունիսի 16-ին և 19-ին անցկացնելու է հերթական հանդիպումները համապատասխանաբար Ուելսի հավաքականի հետ մրցակցի հարկի տակ, և Երևանում Լատվիայի ընտրանու հետ։
«Մենք վստահ ենք մեր ուժերի նկատմամբ։ Եվ պայքարելու ենք Եվրոպայի 2024 թվականի առաջնության ուղեգիր վաստակելու համար։ Մեր ֆուտբոլիստները խաղից առաջ լսում են հայկական երաժշտություն, հոգեբանորեն պատրաստ են, և մարզադաշտի «ճնշումը» չի ազդի մեր ֆուտբոլիստների խաղի վրա»,- ասաց Պետրակովը։
Ծանր հանդիպում է սպասվում։ Այսպես է կարծում հավաքականի հարձակվող Լուկաս Սելարայանը։
«Մենք մարտի ենք պատրաստվում։ Դժվար է լինելու և՛ մեր, և՛ իրենց համար։ Բայց ամեն ինչ անելու ենք 3 միավոր վաստակելու համար։ Մեր հավաքականը շատ լավ ֆուտբոլիստներ ունի, և այս կազմով մենք փորձելու ենք պայքարել Եվրո-2024 թվականի ուղեգրերի համար»,–ասաց Սելարայանը։
Ընտրական խմբում Հայաստանի հավաքականը դեռևս միավոր չունի։ Մեր ընտրանին մեկ հանդիպում է անցկացրել, ու սեփական հարկի տակ զիջել Թուրքիայի հավաքականին 1։2 հաշվով։ Ուելսի ընտրանին երկու խաղ է անցկացրել և ունի 4 միավոր։ Ուելսի հավաքականի հետ մերոնք մրցելու են առաջին անգամ։