ԵՐԵՎԱՆ, 15 հունիսի – Sputnik. Միութենական պետության, ԵԱՏՄ, ԱՊՀ անդամները պետք է հասկանան իրենց փոխհարաբերությունների ռազմավարական բնույթը, որովհետև եթե արտաքին ուժերը նրանց իրենց կողմը քաշեն, հետո առանձին են հաշվեհարդար տեսնելու նրանց հետ։ Այս մասին հայտարարել է Միութենական պետության պետքարտուղար Դմիտրի Մեզենցևը։
Նա հիշեցրել է, որ Մոսկվայի և Մինսկի միջև տարբեր թեմաներով մի շարք վեճեր են եղել, սակայն «երբեք որևէ մեկի մտքով չի անցել կասկածի տակ դնել հարաբերությունների գլոբալ և ռազմավարական լինելը»։
«Համոզված եմ, որ ԱՊՀ-ի և ԵԱՏՄ-ի առանցքային օրակարգում նույնն է։ Իսկ եթե այդպես չէ, ապա պետք է անել ամեն բան, որ այդպես լինի։ ԵԱՏՄ–ում, Միութենական պետությունում միասնական հարաբերությունների գլոբալ բնույթն ու ռազմավարական խնդիրները որպես օրինակ ԵԱՏՄ–ի և ԱՊՀ–ի համար պետք է ակնհայտ լինեն։ Այլապես մեզ իսկապես իրենց շրջանակ կտանեն։ Այնուհետև յուրաքանչյուրին առանձին կպատժեն։ Երբեք այնպես չի լինում, որ ամբողջի առանձին մասն ավելի ուժեղ լինի կամ հավասար ամբողջին», – հայտարարել է Մեզենցևը Պետերբուրգյան միջազգային տնտեսական համաժողովի շրջանակում կազմակերպած «Ինտեգրումների երկխոսություն. գործընկերություն մրցակցության փոխարեն» կլոր սեղանի ժամանակ։
Բացի այդ, Միութենական պետության պետքարտուղարը համաձայն չէ այն փորձագետների հետ, որոնք առաջարկում են հրաժարվել «հետխորհրդային տարածք» տերմինից։ Ըստ նրա, դա տարածք է` միավորված ընդհանուր պատմությամբ, մշակույթով, տնտեսական կապերով, որոնք դեռ գոյություն ունեն։
«Այն փորձագետները, որոնք փորձում են խուսափել «հետխորհրդային տարածք» ձևակերպումից, ուզում են ապրել իրականության գնահատման արհեստական մոդելի շրջանակում, որում մենք ապրում ենք, և մոդելներ են ստեղծում, որոնք բացարձակ իրատեսական չեն և չեն գործի ո՛չ վաղը, ո՛չ էլ մյուս օրը», – նշել է նա։
Պետերբուրգյան միջազգային տնտեսական համաժողովն անցկացվում է հունիսի 14-17-ը։