ԵՐԵՎԱՆ, 15 հունիսի – Sputnik. ԵԱՏՄ-ում միասնական արժույթ ստեղծելը հեշտ չէ, երկրները նպատակ ունեն անցնել ազգային արժույթներով փոխհաշվարկների: Տեղեկությունըլրագրողների հետ զրույցում հայտնել է ՌԴ փոխարտգործնախարար Ալեքսանդր Պանկինը: Նրա խոսքերը մեջբերում է Ինտերֆաքսը։
«ԵԱՏՄ երկրներում, երբ դրանք Խորհրդային Միության հանրապետություններ էին, միասնական արժույթ կար, դրան վերադառնալն այժմ հեշտ չէ, քանի որ յուրաքանչյուրն ունի իր առանձնահատկությունները, իր օրենսդրությունը, պոտենցիալների տարբերությունը, ֆինանսական շուկաների կարգավորման քաղաքականությունը», — այսօր լրագրողներին ասել է Պանկինը:
Նա նշել է, որ ԵԱՏՄ երկրների համար ազգային արժույթների օգտագործումը լուրջ խնդիր է։
«Եվ դա միայն ռուբլուն չի վերաբերում։ Օրինակ՝ Ղրղզստանն ու Հայաստանը քննարկում են, թե ինչպես են առևտուր անելու ազգային արժույթներով»,–ավելացրել է փոխնախարարը։
Պանկինի խոսքով՝ ազգային արժույթներին ամբողջական անցման ժամկետները դժվար է սահմանել, անհրաժեշտ է գործընկերների պատրաստակամությունը և ֆինանսական շուկաների առանձնահատկությունների փոխադարձ հաշվառումը: