ԵՐԵՎԱՆ, 14 հունիսի – Sputnik. Սոչիում ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի հանդիպման ժամանակ քննարկվել են այն նույն հարցերը, որոնք հայկական կողմը պարբերաբար բարձրաձայնում է միջազգային բոլոր հարթակներում։ Խորհրդարանում ճեպազրույցի ժամանակ այս հայտարարությունն արեց «Քաղաքացիական պայմանագիր» խմբակցության պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանը։
«Բոլոր հարթակներում ՀՀ–ն ունի նույն դիրքորոշումը, և այստեղ կարևոր է, որ հյուրընկալող կամ միջնորդ կողմը կարողանա ապահովել ձեռք բերված պայմանավորվածությունների կատարումը։ Մեր պահանջներն են, որ ՌԴ միջնորդությամբ ստորագրված փաստաթղթերը, մասնավորապես 2020 թ. նոյեմբերի 9–ի եռակողմ փաստաթղթի պահանջները կատարվեն»,– ավելացրեց նա։
Նա անդրադարձավ նաև Թուրքիայի և Ադրբեջանի կողմից շահարկվող «Զանգեզուրի միջանցքին»։
««Զանգեզուրի միջանցք» բառակապակցության մտացածին թեման ՀՀ–ի համար փակ է, որքան էլ թուրք–ադրբեջանական կողմը փորձում է պարբերաբար անդրադառնալ դրան։ Դա, իհարկե, Ադրբեջանի կողմից տարածքային պահանջ է ՀՀ–ի նկատմամբ»,– հայտարարեց Խանդանյանը։
Նա հավելեց` այն ծավալով, որ ՀՀ վարչապետն է խոսել տարածքային ամբողջականության փոխադարձաբար ճանաչման մասին, Ադրբեջանը չի խոսել։
«Կա այդ ակնկալիքը հայկական կողմից, որ Ադրբեջանը ևս այդ արձանագրումը պետք է ավելի հստակ անի, որ ճանաչում է ՀՀ տարածքային ամբողջականությունը»,– ընդգծեց նա։
Ըստ Խանդանյանի` սա հասկանալի և ընդունելի է նաև միջնորդ հանդիսացող կողմերի համար, որոնք ներգրավված են բանակցություններում։
«Այնպես, ինչպես առաջարկում է ադրբեջանական կողմը` ունենալ սուվերեն միջանցք ՀՀ տարածքով, նման թեմա չկա ու չի կարող լինել. ՀՀ–ի համար դա չափազանց անընդունելի է, և ՀՀ–ն երբեք չի բանակցի դրա շուրջ»,– վստահեցրեց Խանդանյանը։
Նա չժխտեց, որ նման հայտարարություններն անհանգստություն են պատճառում և չեն նպաստում բանակցային գործընթացին։
Հիշեցնենք` ՀՀ վարչապետ Նիկոլ Փաշինյանը հունիսի 6-9-ը աշխատանքային այցով մեկնել էր Սոչի, որտեղ մասնակցել էր Եվրասիական միջկառավարական խորհրդի և ԱՊՀ կառավարությունների ղեկավարների խորհրդի նիստին։ Փաշինյան–Պուտին հանդիպումը կայացել էր ամսի 9-ին։