«Խոհարարական դիվանագիտություն». Դիլիջանում հունիսի 17–ին կանցկացվի «Միմինո» փառատոնը

ԵՐԵՎԱՆ, 14 հունիսի–Sputnik. Հայերը վրացիներին կսովորեցնեն տոլմա փաթաթել, իսկ վրացիները հայերին` խինկալի պատրաստել։ Դիլիջանում հունիսի 17-18–ին կանցկացվի «Միմինո» հայ-վրացական առաջին մշակութային և խոհարարական փառատոնը։

Փառատոնի կազմակերպիչներից «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը երկու երկրների միջև նման փառատոն նախաձեռնելը համարում է «խոհարարական դիվանագիտություն»։ Այսինքն` մշակութային ժառանգության միջոցով հարևան երկրի հետ երկխոսության հարթակ է ստեղծվում։

«Աշխարհին հասկանալի լեզվով` խոհանոցի լեզվով պետք է ասենք, որ դարերով ապրել ենք միասին և մենք միասին էլ կարող ենք որպես զբոսաշրջային արդյունք ներկայանալ աշխարհին, հյուրասիրել և հյուրընկալել միասին»,–Sputnik Արմենիայի մուլտիմեդոն մամուլի կենտրոնում կայացած ասուլիսի ժամանակ ասաց Մամուլյանը։

Մրցույթին մասնակցելու են հայկական և վրացական կողմից խոհարարներ, որոնց պատրաստած ուտելիքները կգնահատի ժյուրին. հայկական կողմինը` Վրաստանից ժամանած ժյուրին, վրացականը` հայկական ժյուրին։

Փառատոնի մրցույթային մասը տեղի է ունենալու ժամը հունիսի 17-ին, ժամը 13։00–ին, իսկ պաշտոնական բացումը կլինի ժամը 16–ին։ Նախատեսվում են երաժշտական միջոցառումներ Հայաստանից և Վրաստանից մշակութային գործիչների մասնակցությամբ, երգ–երաժշտություն, մրցույթներ։ Միջոցառումները կլինեն մինչև երեկոյան ժամը 23։00–ն։ Լինելու է նաև արագ տոլմա և խնիկալի պատրաստելու մինի մրցույթ հենց բեմի վրա։ Հայաստանի ներկայացուցիչները կփորձեն խինկալի պատրաստել, իսկ վրացիները՝ տոլմա փաթաթել։

«Միմինո» փառատոնը նվիրված է խորհրդային և վրացի դերասան, սցենարիստ և ռեժիսոր Վախթանգ Կիկաբիձեի և հայ կինոռեժիսոր Մհեր Մկրտչյանի հիշատակին։

«Մհեր Մկրտչյանն ասում էր` դուք տոլմա չեք սիրում, որովհետև լավ չի ստացվում պատրաստել, մենք մեր բարեկամներին կօգնենք լավ տոլմա պատրաստել։ Մենք պետք է աշխարհին ասենք, որ իրար հետ խնդիր չունենք, մեր բոլոր խնդիրները լուծվել են սեղանի շուրջ` թամադայի գլխավորությամբ»,–հավելեց Մամուլյանը։

Իսկ «Hotel Management Group»-ի գլխավոր մենեջեր Ալեքսանդր Լիսիչենկոն հայտնեց, որ Վրաստանից կժամանեն ավելի քան 30 տուրօպերատորներ, 6-10 ռեստորանատերեր։ Կժամանեն նաև գինեգործական խոշոր ընկերությունների ներկայացուցիչներ։

««Միմինո» փառատոնն անցկացվելու է և՛ Վրաստանում, և՛ Հայաստանում ամեն տարի։ Ընտրվել Է Դիլիջան քաղաքը, որը բոլորի կողմից սիրված է «Միմինո» ֆիլմով։ Նախատեսվում է հաջորդ տարի նմանատիպ փառատոն անցկացնել Թելավիում»,–նշեց Լիսիչենկոն:

Էկոնոմիկայի նախարարության հանրային կապերի պատասխանատու Աննա Մարգարյանը փառատոնը համարում է նմանը չունեցող` ընդգծելով, որ այն շատ կարևոր է հարևան Վրաստանի հետ զբոսաշրջության ոլորտում կապեր հաստատելու և մշակույթների նմանություններն ու տարբերությունները բացահայտելու համար։

Նա հայտնեց, որ փառատոնի երկրորդ օրը լինելու նաև գիտաժողով, որի շրջանակներում կքննարկվեն հայ–վրացական հարաբերությունները, զբոսաշրջության ոլորտում հեռանկարները։ Նա նաև հայտնեց, որ Վրաստանից կլինի մամուլի ներկայացուցիչ, որը կլուսաբանի փառատոնը և հասանելի այն կդարձնի նաև Վրաստանի համար։

Նշենք, որ փառատոնին լինելու են երեք անվանակարգեր` լավագույն համ, լավագույն տեսք, լավագույն մտահղացում։ Երկու կողմն էլ կարող է պատրաստել իր երկրի ցանկացած ուտեստ։

Նշենք, որ փառատոնի հատուկ հյուրն է Իսրայելի շեֆ-խոհարարների ասոցիացիայի անդամ, «Taste of Peace» ասոցիացիայի նախագահ Սարգիս Յաղուբյանը։

Կազմակերպիչների փառատոնի համար նախատեսել են 7-10 հազար այցելու։