ԵՐԵՎԱՆ, 14 հունիսի – Sputnik. Կառավարության քրտնաջան աշխատանքի շնորհիվ ՀՀ–ն դառնում է հրաշալի վայր ապրելու համար։ ԱԺ լիագումար նիստի ժամանակ հայտարարեց ՀՀ ֆինանսների նախարար Վահե Հովհաննիսյանը` ներկայացնելով 2022 թ. պետական բյուջեի կատարողականը։ Նիստին ներկա են նաև ՀՀ վարչապետ Նիկոլ Փաշինյանը և նախարարները։
Վահե Հովհաննիսյանն իր խոսոում նշեց, որ բոլոր ուղղություններով ՀՀ կառավարությունն ունեցել է ձեռքբերումներ։
«12.5 տոկոս տնտեսական աճի հարցում մեծ դերակատարում է ունեցել ՀՀ կառավարության իրականացրած հարկաբյուջետայաին քաղաքականությունը։ Կոռուպցիայի ցածր մակարդակը, զարգացած ենթակառուցվածքները Հայաստանը դարձնում են հրաշալի վայր ապրելու համար և գավիչ են դարձրել այն բազմաթիվ զբոսաշրջիկների, այդ թվում` ռուս ռելոկանտների համար։ Այստեղ հսկայական դեր ունի կառավարության քրտնաջան աշխատանքը, որ փորձում է ՀՀ–ն քարտեզի վրա դարձնել էական երկիր»,– վստահեցրեց նա։
Ըստ նրա` եթե մինչև 2008 թ. տնտեսական աճը հիմնված է եղել միայն շինարարության վրա, ապա հիմա այն արձանագրվում է բոլոր ոլորտներում արձանագրված առաջընթացով։
«2022 թ. նախորդ տարվա համեմատ 15.5 տոկոսով աճել է միջին անվանական աշխատավարձը` կազմելով 235 576 դրամ։ Իրական աշխատավարձը 8.6 տոկոսանոց գնաճի պայմաններում 6.3 տոկոսով է աճել։ Գործազրկությունը 15.5 տոկոսից նվազել է 13 տոկոսի։ Ասում են, որ սա ապահովվել է միայն ռուս ՏՏ մասնագետների շնորհիվ, սակայն 2022 թ. գրանցված 55 հազար նոր աշխատողներից 45 հազարը ՀՀ քաղաքացիներ են եղել»,– վստահեցրեց նախարարը։
Վահե Հովհաննիսյանի խոսքով` պետական կառավարման համակարգի 19 հիմնարկում հաստիքներն ավելի քան 500–ով կրճատվել են, փոխարենը` հաստիքներ են ավելացել դատական համակարգում` պրոբացիայի համակարգի ներդրման և դատավորների քանակի ավելացման պատճառով։ Բացի այդ, ըստ նրա, 10 հազարով կրճատվել է ընտանեկան նպաստից օգտվող ընտանիքների թիվը` դառնալով 72 748։