ԵՐԵՎԱՆ, 14 հունիսի – Sputnik. Ջրի գինը պիտի բարձրանա, որպեսզի ֆերմերները մոտիվացվեն կաթիլային համակարգի ներդրմամբ։ Այս մասին ԱԺ–ում հայտարարեց ՀՀ էկոնոմիկայի նախարար Վահան Քերոբյանը` պատասխանելով «Քաղաքացիական պայմանագիր» խմբակցության պատգամավոր Ռուստամ Բաքոյանի հարցին։
«Այստեղ խնդիրը կայանում է նրանում, որ մինչև ջուրը գյուղացուն հասցնելը, կարելի է ասել, ամբողջովին սուբսիդավորվում է ջրի գումարը, և ջրի այն գինը, որի դիմաց ֆերմերը վճարում է, իրեն ոչ մի ձևով չի մոտիվացնում ավելի խնայողական համակարգեր դնել։ Խնայողական համակարգերի մեջ արվող ներդրումները հիմնավորված չեն, քանի որ խնայողություններն այնքան փոքր գումար են կազմում, որ այդ ներդրումները չարժե անել։ Դրա համար ջրի ոլորտում պետք է տեղի ունենան բարեփոխումներ, թանկանա ջրի գինը, որպեսզի ֆերմերները մոտիվացված լինեն ներդրումներ անել կաթիլային համակարգի տեղադրման մեջ»,– հայտարարեց նա։
Նախարարի խոսքով` ինտենսիվ այգիների ներքո արդեն կա կաթիլային ոռոգման բաղադրիչ, և ամեն տարի մոտ 1500 հա հողամասերի վրա դրվում է այս համակարգը։
«Այս տարի անձրևացման համակարգերն էլ են բավականին մեծ պահանջարկ վայելում։ Այսօր մենք կարող ենք խոսել փոքր ծավալների մասին` 5-10 հազար հեկտարների սահմաններում, որը մեր մշակվող վարելահողերի 2-3 տոկոսի սահմաններում է»,– նկատեց Քերոբյանը։
Նա համաձայն է այն դիտարկման հետ, որ պետք է ավելի արագ անցնել խնայողական ջրի համակարգերին։
Նշենք, որ ավելի քան 10 տարի ոռոգման ջրի գինը մեկ խմ համար կազմում է 11 դրամ, բայց այս դեպքում էլ այս վճարների հավաքագրումը թերակատարվում է. 2022 թ–ին պակասուրդը կազմել է մոտ 30 տոկոս։