ԵՐԵՎԱՆ, 14 հունիսի – Sputnik. Եթե ՀՀ պարտքը 2021 թ–ի դեկտեմբերին ՀՆԱ–ի նկատմամբ կազմում էր 60.2 տոկոս, ապա 2022 թ–ի դեկտեմբերին այն կազմել է 46.7 տոկոս։ ԱԺ–ում2022 թ–ի պետական բյուջեի կատարողականի քննարկմաննայս մասին հայտարարեց ՀՀ ֆինանսների նախարար Վահե Հովհաննիսյանը։
«Սա հիանալի արդյունք է։ Օրինակ` Չինաստանի պարտքը կազմում է 77 տոկոս, Վրաստանինը` 41 տոկոս, Աֆղանստանինը` 7.4 տոկոս։ Ինչո՞ւ։ Որովհետև Աֆղանստանը աղքատ երկիր է` անկայուն քաղաքական համակարգով, և չի կարող երաշխավորել պարտքի վերադարձ։ Այսպիսի երկներին օգնություն են տալիս։ Ես ուրախ եմ արձանագրելու, որ ՀՀ–ն օգնություն ստացող երկիր չէ։ Ընդհակառակը` մենք դարձել դոնոր երկրների անդամ, և մեր փոքրիկ ներդրումն ունենք աղքատ երկրներին աջակցելու հարցում»,–ասաց նախարարը։
Նա անդրադարձավ այն քննարկումներին, թե կառավարության պարտքը հատել է 10 մլրդ դոլարի սահմանը։
«Այո՛, հիմա սա լա՞վ է, թե՞ վատ։ Օրինակ` Վրաստանի պետական պարտքը կազմում է 23.5 մլրդ դոլար, Լիտվայինն էլ է նույնքան, Սինգապուրի պարտքը 813 մլրդ դոլար է։ Որևէ խելամիտ մարդ պարտքի մասին դատողություն չի անում` ելնելով դրա բացարձակ ծավալից։ Դրամային արտահայտությամբ, մեր պարտքը 4 տրիլիոն210 մլրդ–ից իջել է 3 տրիլիոն970 մլրդ դրամի»,– վստահեցրեց Վահե Հովհաննիսյանը։
Ըստ ֆինանսների նախարարի` 13.5 տոկոսային կետով արտաքին պարտքի նվազումը պայմանավորված է երկու հիմնական գործոնով` ՀՀ տնտեսությունն աճել է շատ ավելի արագ, քան պարտքը, դրամն արժևորվել է, և դրամով արտահայտված արժութային պարտքը նվազել է։
«Նույնիսկ այսպիսի փայլուն ցուցանիշների ֆոնին մենք պետք մտածենք հնարավոր ռիսկերի մասին»,– հավաստիացրեց նախարարը։
Ըստ նրա` թե՛ եկամտային, թե՛ ծախսային մասով 2022 թ–ի պետական բյուջեն իրականացվել է լիակատար` իր նախանշած թիրախային շրջակայքում։
Հիշեցնենք` ՀՀ ֆինանսների նախարարության տվյալների համաձայն` 2022 թվականի դեկտեմբերի վերջի դրությամբ Հայաստանի պետական պարտքը կազմել էր 10 մլրդ 638 մլն դոլար: Մեկ տարում այն աճել է 15.3%-ով կամ 1 մլրդ 412 մլն դոլարով: Պետական պարտքը աճել է ներքին պարտքի հաշվին: Տարեվերջին ներքին պետական պարտքը կազմել է մոտ 4 մլրդ 189 մլն դոլար՝ տարվա ընթացքում ավելանալով մոտ 1 մլրդ 610 մլն դոլարով կամ 62.5%-ով: