ԵՐԵՎԱՆ, 13 հունիսի - Sputnik. Ռուսական դասագրքերի մատակարարումները բարեկամ երկրներ արդեն ընթանում են։ Երևանում հայ-ռուսական գիտակրթական ֆորումի շրջանակում այս մասին հայտարարել է ՌԴ լուսավորության նախարար Սերգեյ Կրավցովը:
«Ռուսաց լեզուն ԱՊՀ շատ երկրներում է ուսումնասիրվում, այդ պատճառով մենք մեծ ծրագիր ունենք և առավելագույնս բավարարում ենք բոլոր կարիքները Ուզբեկստանում, Ղրղզստանում, Տաջիկստանում»,-ասել է Կրավցովը՝ պատասխանելով բարեկամ երկրներին դասագրքերի փոխանցման ծրագրերի մասին հարցին»։
Խոսելով ոչ բարեկամական երկրներում ռուսական դպրոցների խնդիրների և դրանց աջակցությանն ուղղված միջոցառումների մասին՝ Կրավցովն ասել է, որ պետք է խոսել ոչ թե ոչ բարեկամ երկրների, այլ որոշ երկրների ղեկավարության մասին:
«Ինչ վերաբերում է աջակցության միջոցառումներին․․․ աջակցության գլխավոր միջոցառումն այն է, որ այդ դպրոցները շարունակում են գործել` չնայած բոլոր սահմանափակումներին։ Երեխաները սովորում են, և մարդիկ իրենք են ընտրում այդ դպրոցները։ Դա ամեակարևորն է»,-ասել է նախարարը։
Նշենք` ՀՀ ԿԳՄՍ նախարար Ժաննա Անդրեասյանն այսօր նույն համաժողովի շրջանակում ասել էր, որ հնարավոր է` ՀՀ–ում ռուսական դպրոցներ բացվեն հայ–չինական դպրոցի օրինակով։
Հավելենք, որ Հայաստանում ռուսերենով ուսուցում է իրականացվում 3 դպրոցում։ Երևանում ՌԴ ՊՆ թիվ 21 հիմնական դպրոցում ընդունելությունն իրականացվում է միայն ՌԴ զինծառայողների և դիվանագետների երեխաների համար, իսկ Գյումրու թիվ 19 ռուսական դպրոցում սովորում են ՌԴ զինծառայողների երեխաները, սակայն այդտեղ կրթություն ստանալու հնարավորություն ունի ՌԴ ցանկացած քաղաքացու երեխա։ Երրորդն Արտաշատի սահմանապահ զորամասի դպրոցն է։
Հայաստանի 63 դպրոցում իրականացվում է ռուսերենով խորացված ուսուցում, որից 33-ը` Երևանում, 30-ը՝ մարզերում:
Այս տարի` հունիսի 6-ին, ՌԴ կրթության փոխնախարար Տատյանա Վասիլևան հայտարարել էր, որ իրենք մշակում են Հայաստանում, Սիրիայում, ինչպես նաև աֆրիկյան մի շարք երկրներում համատեղ դպրոցների ստեղծման հարցը։