ԵՐԵՎԱՆ, 13 հունիսի – Sputnik. Ռելոկանտները ՀՀ բանկերում զգալի ծավալի ավանդներ են պահում, բայց առավելապես ոչ թե ժամկետային, այլ ցպահանջ։ Լրագրողների հետ հանդիպմանը այս մասին ասաց ՀՀ կենտրոնական բանկի նախագահ Մարտին Գալստյանը։
Նա նշեց, որ հարցումների համաձայն՝ ռուսաստանցիների շրջանում աճել է նրանց թիվը, ովքեր ցանկանում են 6 ամսիս ավել մնալ Հայաստանում։
«Ժամանած քաղաքացիների զգալի մասը չի ակնկալում ռուս-ուկրաինական հակամարտության շուտափույթ ավարտ, ուստի նրանք ակնկալում են ավելի երկար մնալ ՀՀ–ում», - հայտարարեց Գալստյանը։
Նրա խոսքով` Հայաստանում ոչ ռեզիդենտ ֆիզիկական անձանց ավանդների ծավալը մեկ տարվա ընթացքում կրկնապատկվել է՝ կազմելով 1 տրլն 132 մլրդ դրամ: Տարեսկզբից այն աճել է մոտ 0,5 տոկոսով։
Հնարավոր է` աճի դանդաղումը զուտ տեխնիկական պատճառ ունի (բանկերը կարող են ռելոկանտներին ոչ ռեզիդենտներից ռեզիդենտներ «տեղափոխել», քանի որ նրանք ստանում են համապատասխան կարգավիճակ)։ Գալստյանի խոսքով` այդ հարցը պետք է առանձին դիտարկել։