ԵՐԵՎԱՆ, 13 հունիսի -Sputnik. Եթե Ուկրաինայից ՌԴ տարածքի գնդակոծությունները շարունակվեն, ապա կդիտարկվի Ուկրաինայի տարածքում սանիտարական գոտի ստեղծելու հարցը, որտեղից ռուսական շրջաններ հնարավոր չի լինի հասնել, հայտարարել է Ռուսաստանի նախագահ Վլադիմիր Պուտինը:
«Ուկրաինայի տարածքից մեր տարածքը գնդակոծելու հնարավորությունը մնում է, և այստեղ լուծման մի քանի եղանակ կա։ Նախ՝ հակահրթիռային պայքարի արդյունավետության բարձրացումը, բայց դա չի նշանակում, որ, այսպես կոչված, «Ժամանումներ» չեն լինի մեր տարածք»,-ասել է Պուտինը ռազմական թղթակիցների հետ հանդիպման ժամանակ։
«Իսկ եթե դա շարունակվի, ապա մենք, հավանաբար, պետք է քննարկենք, ես դա շատ խնամքով եմ ասում, Ուկրաինայի տարածքում ինչ-որ սանիտարական գոտի ստեղծելու հարցը՝ այնպիսի հեռավորությամբ, որ այնտեղից հնարավոր չլինի հասնել մեր տարածքին»,-հավելել է նա:
Միաժամանակ ՌԴ նախագահն ընդգծել է, որ «դա առանձին հարց է»։
«Ես չեմ ասում, որ վաղը ձեռնամուխ կլինենք այդ աշխատանքին. պետք է նայել, թե ինչպես կզարգանա իրավիճակը»,-հավելել է Ռուսաստանի ղեկավարը:
Նա նաև նշել է, որ Ուկրաինայի հետ սահմանի ամրապնդման գործընթացն արդեն իսկ ընթանում է, դա անհրաժեշտ է ՌԴ քաղաքացիների անվտանգության համար:
Խոսելով Բելգորոդի շրջանի գնդակոծությունների մասին՝ ՌԴ նախագահն ասել է, որ «կարելի էր ենթադրել դա և ավելի լավ պատրաստվել, բայց խնդիրը կլուծվի»:
Պուտինն ընդգծել է, որ Ուկրաինայում հատուկ ռազմական գործողության նպատակները փոխվում են ընթացիկ իրավիճակին համապատասխան, բայց ընդհանուր առմամբ նույնն են մնում և հիմնարար բնույթ են կրում Ռուսաստանի համար: