ԵՐԵՎԱՆ, 13 հունիսի–Sputnik. Միջազգային մեծ համբավ ունեցող ֆինանսական ինստիտուտները որոշում են կայացրել հայկական պետական պարտատոմսերում ներդրումներ անել։ Լրագրողների հետ հանդիպմանն տեղեկացրեց ՀՀ կենտրոնական բանկի նախագահ Մարտին Գալստյանը։
«Մեր կողմից տոկոսադրույքների նվազեցման արդյունքում հայկական դրամով գնանշված հայկական պարտատոմսերի շուկայում մենք մի ֆենոմեն ենք տեսնում. միջազգային մեծ համբավ ունեցող ֆինանսական ինստիտուտները որոշում են կայացրել հայկական պետական պարտատոմսերում ներդրումներ անել։ Ենթադրում եմ, որ ակնկալիքն այն է, որ ՀՀ կառավարությունն ու ԿԲ–ն իրականացնում են լավ, որակյալ մակրոտնտեսական քաղաքականություն»,– կարծում է Մարտին Գալստյանը։
Նրա ենթադրությամբ` ներդրողներն այն կարծիքին են, որ ՀՀ ԿԲ դրամավարկային քաղաքականությունը տալու է իր պտուղները և հաջողվելու է հաղթահարել գնաճը, որի արդյունքում նվազելու է տոկոսադրույքը, իսկ պետական պարտատոմսերի գները թանկանալու են։
Ուստի, վերջին մի քանի ամսվա ընթացքում միջազգային ֆինանսական ինստիտուտների մուտքը հայկական պետական պարտատոմսերի շուկա ԿԲ նախագահը պայմանավորվում է հենց այդ հանգամանքով։