Իշխանությունը փաստացի սուբսիդավորում է էլեկտրոնային ծխախոտ ծխելը. Թորոսյանը` ակցիզի մասին

ԵՐԵՎԱՆ, 13 հունիսի–Sputnik. Հայաստանում էլեկտրոնային ծխախոտի ակցիզը հինգ անգամ ավելի ցածր է, քան սովորական ծխախոտի ակցիզը, ինչն անթույլատրելի է։ Այս մասին ԱԺ հերթական նիստի ժամանակ հայտարարեց «Քաղաքացիական պայմանագիր» խմբակցության պատգամավոր, առողջապահության նախկին նախարար Արսեն Թորոսյանը՝ Հարկային օրենսգրքում փոփոխությունների նախագծի քննարկման ժամանակ։

Փոփոխություններով նախատեսվում է փոփոխել ակցիզային հարկի դրույքաչափերը։

Ծխախոտային խառնուրդների չոր տաքացմամբ գործող էլեկտրոնային սիգարետների համար ակցիզ է սահմանվել հազար հատի համար 3100 դրամ, մինչդեռ սովորական ծխախոտի համար՝ 14 640 դրամ:

Ի պատասխան ֆինանսների փոխնախարար Արման Պողոսյանը վստահեցրեց, որ էլեկտրոնային ծխախոտի տարածման ռիսկեր այժմ չեն նկատվում:

«Բացի այդ, զբոսաշրջիկների համար են ձևավորվել այդ էլեկտրոնային ծխախոտների մրցակցային գները, որոնք սպառում են մեր երկրում և նաև տանում են իրենց հետ։ Ավելացնելով էլեկտրոնային ծխախոտի ակցիզը՝ մենք կզրկվենք դրանց վաճառքից և հարկից, փոխարենը, վստահ եմ` չենք հասնի ծխողների թվի նվազմանը», - հայտարարեց փոխնախարարը։

Իր հերթինԱԺ տնտեսական հարցերի հանձնաժողովի փոխնախագահ Բաբկեն Թունյանը նշեց, որ պետք է պարզել` արդյոք սահմանափակող–արգելող միջոցառումների արդյունքում վերջին տարիներին նվազել է ծխողների թիվը:

«Եկեք անկեղծ լինենք` եթե ծխախոտի գինը պետք է բարձրանա 32 տոկոսով կամ 32 դրամով, իսկ հաջորդ տարի դառնա 45 դրամ, խիստ կասկածում եմ, որ դա որևէ ազդեցություն կունենա ծխախոտի դեմ պայքարի վրա։ Եթե 1000 դրամանոց ծխախոտը դառնա 5000 դրամ, այդ ժամանակ մարդը կարող է մտածել՝ ծխի, թե ոչ։ Այդ ժամանակ էլ ռիսկեր կան, որ մարդիկ կարող են անցնել ավելի ցածրորակ սիգարետների կամ մաքսանենգ եղանակով բերվածների»,- նկատեց Թունյանը։

Նշենք, որ 2023 թվականից Հայաստանում ակցիզային հարկով հարկվում են նաև հեղուկ նիկոտինային խառնուրդների տաքացմամբ էլեկտրոնային ծխախոտները։ Սահմանված է 55 դրամ ակցիզային հարկ։