ԵՐԵՎԱՆ, 13 հունիսի–Sputnik. Աշխատաշուկայում արձանագրված դրական դինամիկան եղել է ՀՀ Կենտրոնական բանկի հիմնական լեյտմոտիվը` իջեցնելու վերաֆինանսավորման տոկոսադրույքը։ Sputnik Արմենիայի հարցին ի պատասխան այս մասին ասաց ՀՀ ԿԲ նախագահ Մարտին Գալստյանը։
Հայտնել ենք, որ Հայաստանի Կենտրոնական բանկը խորհրդի նիստում որոշել է նվազեցնել վերաֆինանսավորման տոկոսադրույքը 0.25%-ով ՝ 10.75%-ից հասցնելով 10.5%-ի:
«Հայաստանում տարեկան կտրվածքով անվանական աշխատավարձերի աճը 20 տոկոսի շրջանակում է, որը բավականին մեծ թիվ է։ Վերջին ամիսներին, իհարկե, աճի տեմպերը դանդաղել են»,– նշեց նա։
0.25 տոկոսով վերաֆինանսավորման տոկոսադրույքի իջեցման համար ԿԲ խորհրդի համար անկյունաքարային է եղել այն, որ աշխատուժի շուկայում կարող են պարույրաձև զարգացում ունենալ։
«Արդյունքում մենք մի քիչ զսպվածություն էինք ցուցաբերում ու նույնիսկ երբ գնաճը սկսեց նվազել, մեր տոոկսադրույքը վերջին երկու հանդիպումներին թողեցինք անփոփոխ։ Տոկոսադրույքի փոփոխությունը նաև մեր դրամավարկային քաղաքականության մեջ մեր ռիսկ–մենեջմենթային կառավարումն է, և կարծում եմ` մեր գործողությունները շատ կշռադատված են եղել»,– վստահեցրեց Մարտին Գալստյանը։
Հավելենք, որ ԿԲ–ն վերաֆինանսավորման տոկոսադրույքը գրեթե պարբերաբար բարձրացրել է 2020թ–ի 44–օրյա պատերազմից սկսած։
Սա վերջին 2-3 տարվա ընթացքում վերաֆինանսավորման տոկոսադրույքի առաջին էական նվազումն էր։