ԵՐԵՎԱՆ, 13 հունիսի–Sputnik. Բնության, պատմամշակութային հուշարձանները վնասելու դեպքում տույժերը պետք է կրկնապատկել։ ՀՀ ԱԺ ութերորդ գումարման հինգերորդ նստաշրջանի հերթական նիստին նման առաջարկով հանդես եկավ «Հայաստան» խմբակցության պատգամավոր Լիլիթ Գալստյանը։
«Առաջարկում եմ փոփոխություններ կատարել «Վարչական իրավախախտումների մասին» օրենքում։ Այն ուղղված է բնության, պատմության, մշակույթի հուշարձանների պահպանության նկատմամբ հանրային և վարչական պատասխանատվության մեծացմանը։ Առաջարկվում է վարչական տույժերի չափը կրկնակի բարձրացնել, օրինակ` 80–պատիկը դարձնել 150–ապատիկ և այլն»,– հայտարարեց պատգամավորը։
ՔՊ պատգամավոր Սիսակ Գաբրիելյանը շնորհակալություն հայտնեց նրան` նման նախաձեռնությամբ հանդես գալու համար` նշելով, որ իր հիշելով` սա ընդդիմության առաջին կամ երկրորդ օրենսդրական նախաձեռնությունն է։
Նա կարծում է, որ Լիլիթ Գալստյանի առաջարկած պատժամիջոցների չափը շատ քիչ է և առաջարկեց ոչ թե, օրինակ` 100 հազար դրամ սահմանել տույժը, այլ 1 մլն դրամ։
«Եթե հաշվի առնենք, որ նաև բնության մասին է խոսքը գնում, 100 հազարից ավելի էլ վարչարարության վրա է գումար ծախսվելու, որպեսզի համապատասխան մասնագետները հասնեն դեպքի վայր ու արձանագրություն կազմեն։ Այստեղ հանրային ավելի լայն կոնսենսուս կունենաք, եթե բնության հուշարձանների նկատմամբ ոտնձգության տույժը հասնի 1 կամ 2 մլն դրամի չափի»,– նկատեց Սիսակ Գաբրիելյանը։
Ըստ նրա` 15 տարի առաջ 50 հազար դրամը բավականին կլորիկ գումար էր, իսկ հիմա, հաշվի առնելով գնաճը, դա չնչին գումար է։ Նրա համոզմամբ` որոշ դեպքերում մարդիկ անգամ պատրաստ են այդ տուգանքը վճարել ու շարունակել նույն արատավոր գործունեությունը։
«Եթե կարող ենք այս դահլիճում կոնսենսուսի գալ ու ավելի բարձրացնել տույժերի չափը, ես միայն ուրախ կլինեմ։ Կարող ենք քննարկել, ես չեմ առարկի»,– հայտարարեց Լիլիթ Գալստյանը։
Թե կառավարության ներկայացուցիչը՝ ՀՀ ԿԳՄՍ փոխնախարար Ալֆրեդ Քոչարյանը, թե ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Նարեկ Բաբայանը հատարարեցին, որ կողմ են ընդդիմադիր պատգամավորի նախագծին և ունեն դրական դիրքորոշում։