Ծանրամարտի աշխարհի առաջնությունը Հայաստանում չի կայանա

Ծանրամարտ
Բահրեյնի հայտն ավելի մեծ աջակցություն է ստացել, քան մյուս երկու թեկնածուներինը։
Sputnik
ԵՐԵՎԱՆ, 12 հունիսի – Sputnik. 2024 թվականի ծանրամարտի աշխարհի առաջնությունը չի կայանա Հայաստանում, այն կանցկացվի Բահրեյնում։ Տեղեկությունը հայտնում է ՀՀ ազգային օլիմպիական կոմիտեն։
«Բահրեյնի մայրաքաղաք Մանաման կհյուրընկալի 2024 թվականի ծանրամարտի աշխարհի առաջնությունը: Քվեարկությունը տեղի է ունեցել Կուբայի մայրաքաղաք Հավանայում անցկացված ծանրամարտի միջազգային ֆեդերացիայի (IWF) գործկոմի նիստում»,– ասված է հաղորդագրության մեջ:
Նշվում է, որ Բահրեյնի հայտը ստացել է ավելի մեծ աջակցություն, քան մյուս երկու թեկնածուներինը՝ Երևանինն ու Տիրանայինը:
«Սա կլինի ծանրամարտի ամենակարևոր մրցումը, որը երբևէ անցկացվել է Բահրեյնում, որը հաջողությամբ ընդունել է 2022թ.Ասիայի առաջնությունը»,–նշված է հաղորդագրության մեջ:
2024 թ. աշխարհի առաջնությունը նշանակված է նոյեմբեր-դեկտեմբերին՝ Փարիզի օլիմպիական խաղերի ավարտից մի քանի ամիս հետո:
Հիշեցնենք, որ ապրիլին Երևանում անցկացվեց ծանրամարտի Եվրոպայի առաջնությունը։ Բացման հանդիսավոր արարողության ժամանակ միջադեպ գրանցվեց։ Դիզայներ, ոճաբան Արամ Նիկոլյանն անսպասելի վազեց դեպի բեմ, դրոշակակիր աղջկա ձեռքից խլեց Ադրբեջանի դրոշն ու այրեց այն։ Նիկոլյանին բերման ենթարկեցին, ապա ազատ արձակեցին։