ԵՐԵՎԱՆ, 9 հունիսի – Sputnik. ԵԱՏՄ-ում կգործարկվի միութենական ծրագրերի սուբսիդավորման նախագիծը։ Այսօր Սոչիում ԱՊՀ և ԵԱՏՄ երկրների կառավարությունների ղեկավարների նիստում այս մասին հայտարարեց ՌԴ վարչապետ Միխայիլ Միշուստինը:
Ռուսաստանի կառավարության ղեկավարի խոսքով՝ ներկայում մշակվում է նորմատիվային բազա նախագծի մեկնարկի համար։ Ակնկալվում է, որ առաջին աջակցությունը կտրամադրվի արդեն հաջորդ տարվա սկզբին:
«Մեր համագործակցությունը զարգանում է շատ դինամիկ, մենք մանրամասն և կառուցողական քննարկեցինք միության գործունեությանը վերաբերող առավել կարևոր հարցերը։ Քննարկել ենք նաև ներքին, արտաքին դաշտում այդ փոխգործակցության և խորացման հնարավորությունները», - ասել է Միշուստինը։
Կողմերը քննարկել են երկաթուղային փոխադրումների թվայնացման հարցը, նավիգացիոն կապարակնիքների կիրառման մասին համաձայնագիրը, անդրադարձել եվրասիական տարածքում անկախ վարկանիշային գործակալության ստեղծման ժամանակացույցին:
Միշուստինը տեղեկացրել է, որ ստորագրվել է Եվրասիական տնտեսական միությունում գիտական աստիճանների փաստաթղթերի փոխադարձ ճանաչման մասին համաձայնագիրը։ Դա թույլ կտա, որ բարձր որակավորում ունեցող մասնագետները կարողանան աշխատանք գտնել մասնագիտական գործունեություն ծավալելԵԱՏՄ ցանկացած երկրում։
Նա շեշտել է, որ այսօր երկրները հիմնականում կենտրոնացնում են ջանքերը տեխնոլոգիական ինքնիշխանության ձեռքբերման համար։ Շատ մեծ ուշադրություն է դարձվում նաև այնպիսի հարցերի լուծմանը, որոնք թույլ կտան արտասահմանյան արտադրանքը փոխարինել, ռազմավարական ոլորտներում համատեղ արտադրություններ սկսել։ Միշուստինի խոսքով՝ «Եվրասիան մեր տունն է» ցուցահանդեսում իրենք տեսել են երկրների սերտ փոխգործակցության պայմաններում իրականացվող ավելի քան 200 կոոպերացիոն նախագծեր:
«Դրանք ընդգրկում են գրեթե բոլոր ուղղությունները, այդ թվում՝ արդյունաբերությունը, ֆինանսները, թվայնացումը, առողջապահությունը, կրթությունը, սպորտը և այլն», - ասել է Միշուստինը:
Նրա խոսքով ՝ նախագծերն ապացուցում են, որ ռեսուրսների, գիտելիքների միավորումը թույլ կտա թողարկել գերազանց, պահանջված, մրցունակ արտադրանք: Երկրները, Միշուստինի խոսքով, նաև միջոցներ են ձեռնարկում իրենց մասնաբաժինն ավելացնելու ուղղությամբ։