ԵՐԵՎԱՆ, 9 հունիսի – Sputnik. Բանակցությունները այնպիսի բան են, որոնք երբեք հարթ չեն ընթանում։ Ինչպես հայտնում է «Արմենպրեսը», այս հայտարարությունն արել է փոխվարչապետ Տիգրան Խաչատրյանը` մեկնաբանելով Վաշինգտոնում Հայաստանի և Ադրբեջանի արտաքին գործերի նախարարների բանակցությունների հետաձգումը։
Հունիսի 8-ին հայտնի դարձավ, որ ադրբեջանական կողմի խնդրանքով հետաձգվել է Արարատ Միրզոյան–Ջեյհուն Բայրամով հանդիպումը, որը նախատեսված էր հունիսի 12–ին։
«Իհարկե, արտաքին գործերի նախարարությունը այս անգամ հետաձգման պատճառների վերաբերյալ պարզաբանում տարածել է, և դրա կապակցությամբ որևէ լրացնելու բան չունեմ։ Կարծում եմ, որ կարճ ժամանակ անց այդ հետաձգված բանակցությունները տեղի կունենան»,- ասել է փոխվարչապետը։
Անդրադառնալով այն հարցին, թե արդյոք Ադրբեջանը արձագանքել է խաղաղության պայմանագրի վերաբերյալ հայկական կողմի առաջարկներին, Խաչատրյանը նշել է, որ աշխատանքային գործընթաց է, և մշտապես տեսակետներ են փոխանակվում։
«Եթե ինչ-որ մի փուլում մենք ենք առաջարկություն տվել, որոնց վերաբերյալ դեռ չգիտենք ադրբեջանական կողմի դիրքորոշումը կամ հակառակը, այդ ամենը սովորական գործընթաց է։ Այստեղ հատուկ որևէ բան դիտարկելու կարիք չկա։ Կարևորն այն է, որ կողմերն արձանագրում են, որ վերջին շրջանում տեղի ունեցող քննարկումները և բանակցությունները ավելի են մոտեցնում տեսակետները»,- նշել է Խաչատրյանը։
Ճշտող հարցին, թե հայկական կողմը ստացել է Ադրբեջանի արձագանքները, փոխվարչապետը պատասխանել է՝ վստահաբար ինչ-որ մի փուլում հայկական կողմը առաջարկներ ստացել է։
Նա հիշեցրել է, որ ԱԳՆ–ն պարզաբանումներ է տարածել հայկական կողմի վերջին առաջարկների կապակցությամբ ստացված արձագանքի վերաբերյալ։ Խաչատրյանն ընդգծել է` պաշտոնական տեղեկությունն այն է, ինչ ԱԳՆ-ն տարածում է։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։