ԵՐԵՎԱՆ, 9 հունիսի – Sputnik. ՀՀ վարչապետ Նիկոլ Փաշինյանի որդին` Աշոտ Փաշինյանը, շարունակում է պնդել իր տեսակետը, որ իր առևանգման գործով կալանավորված Գայանե Հակոբյանի արարքը պետք է իրավական գնահատական ստանա։
Երևանի առաջին ատյանի ընդհանուր իրավասության դատարանի մոտ նա լրագրողներին ասաց, որ օրենքը հավասար է բոլորի համար, և յուրաքանչյուր միջադեպ ՀՀ–ում օրենքին համապատասխան գնահատական պետք է ստանա։
«Ինչ վերաբերում է «հերոսի մայր» արտահայտությանը, ապա դա ոչ մեկը չի նսեմացնում ու չի կարող նսեմացնել, և գլուխ ենք խոնարհում բոլոր հերոսների, նրանց ծնողների առջև։ Միևնույն ժամանակ ասում եմ, որ օրենքը հավասար է բոլորի համար»,– ընդգծեց նա։
Ինչ վերաբերում է իր առևանգման փորձին, ապա Փաշինյանը հայտարարեց, որ, ճիշտ է, Գայանե Հակոբյանի հետ երբևէ չի շփվել, սակայն մյուս ծնողների հետ տարբեր առիթներով շփվել է, փոխադարձ հարգանքով խոսակցություն է եղել, այդ պատճառով չի կարծել, որ որևիցե տգեղ միջադեպ կարող է տեղի ունենալ։
Նշենք, որ Աշոտ Փաշինյանի գործով այսօրվա դատական նիստն ընթանում է դռնփակ։
Հիշեցնենք` մայիսի 17-ին տեղեկություն տարածվեց, թե «Որդիների կանչ» ՀԿ–ի անդամները փորձել են առևանգել վարչապետի որդուն։ Վերջինս հաղորդում էր ներկայացրել ոստիկանություն, որից հետո ՀՀ քննչական կոմիտե քրեական գործ հարուցեց մարդուն առևանգելու հոդվածով, կալանավորվեց մեկ անձ` զոհված զինծառայող Ժորա Մարտիրոսյանի մայրը` Գայանե Հակոբյանը։
Հունիսի 5-ին հայտնի դարձավ, որ զոհված զինծառայողի մոր խափանման միջոցը փոխվել է, ընտրվել է տնային կալանքը։ Սակայն նույն օրը Երևանի ընդհանուր իրավասության քրեական դատարանի դատավոր Մանվել Շահվերդյանը որոշեց տնային կալանքը փոխարինել 1 ամիս 15 օր կալանքով։