ԵՐԵՎԱՆ, 9 հունիսի – Sputnik. Ադրբեջանի նախագահ Իլհամ Ալիևը չի թաքցնում իր ագրեսիվ ցանկությունները` տարածքային նկրտումներ դրսևորելով Տավուշի, Գեղարքունիքի, Արարատի և Սյունիքի մարզերի նկատմամբ, ուստի այդ պարագայում շատ կարևոր է, որ սահմանամերձ համայնքների բնակիչները լծվեն իրենց տները պաշտպանելու գործին։ Sputnik Արմենիայի հետ զրույցում այս տեսակետը հայտնեց հասարակական գործիչ, «Երկրապահ կամավորականների մասին» օրենքի համահեղինակ Մեսրոպ Մանուկյանը։
Սյունիքի մարզպետ Ռոբերտ Ղուկասյանն ավելի վաղ հայտարարել էր, թե մարզի սահմանամերձ բնակավայրերում անհրաժեշտ ինքնապաշտպանության համար համապատասխան քանակությամբ զենք կա։ Արձագանքելով այն մտահոգություններին, որ ադրբեջանական դիրքերն այսօր շատ մոտ են, և անհրաժեշտ է անվտանգային միջոցառումներ իրականացնել, մարզպետն ասել էր, որ զենքը մարզում այնքան է, որքան անհրաժեշտ է համարում ՀՀ պաշտպանության նախարարությունը։
«Զենք ունենալը մի խնդիր է, իսկ դրա հետ վարվելն ու ՊՆ–ի հետ համագործակցելը բոլորովին այլ խնդիր։ 44-օրյա պատերազմը ցույց տվեց, որ այդ ամենի կազմակերպումն ըստ էության եղել է ամենամեծ բացթողումը, հետևաբար այսօր սահմանամերձ համայնքների բնակիչների դերն ինքնապաշտպանության առումով խիստ կարևոր է»,– ասաց Մանուկյանը։
Նրա դիտարկմամբ` համայնքի բնակիչը լավագույն հետախույզն է, որովհետև նրանից լավ տեղանքին ոչ ոք ծանոթ չէ։ Պաշտպանության, թե հարձակման պարագայում նա բոլորից լավ է տեղյակ, թե որտեղ կարող են հարմարավետ թաքստոցները կամ առաջխաղացման բարենպաստ դիրքերը։ Այդ տեսանկյունից աշխարհազորայինների դերակատարումն իրոք անգնահատելի էր արցախյան առաջին պատերազմում, մինչդեռ այսօր սահմանամերձ համայնքների բնակիչների ինքնապաշտպանությունը կազմակերպելու հարցում, ըստ Մանուկյանի, գործուն քայլեր չեն արվում։
«Երկրի ղեկավարությունը չի բացառում Ադրբեջանի կողմից հերթական ագրեսիայի հավանականությունը, սակայն դրան պատրաստ լինելու կամ դրան դիմակայելու առումով որևէ բան լիարժեք չի կազմակերպվում։ Նախ պետք է ֆինանսավորվեն սահմանամերձ համայնքների բնակիչները և ձեռնարկվի պաշտպանական ամբողջ ճակատի կահավորումը` համագործակցելով ՊՆ–ի հետ, որպեսզի ցանկացած հրահանգի դեպքում այդ մարդիկ դառնան և՛ պաշտպան, և՛ գրոհող, և՛ հետախույզ։ Այդ բացն առկա է ինչպես, Սյունիքում, այնպես էլ Գեղարքունիքում և Տավուշում, հետևաբար շատ կարևոր է, որպեսզի այս պահից մեկնարկի ՊՆ–ի և համայնքների սերտ համագործակցությունը»,– ասաց մեր զրուցակիցը։
Մանուկյանի կարծիքով` զինակոչային տարիքի տղամարդիկ, որոնք ծառայել են բանակում, ունակ են և պատրաստ, իսկ մյուսների համար տեղերում պետք է կազմակերպվեն կարճատև վարժանքներ` կատարելագործելով զենքի հետ վարվելու հմտությունները։ Ըստ նրա` զենքերը պետք է ոչ թե բաժանվեն ու պահվեն տներում, այլ լինեն համայնքապետարաններում կամ այլ ապահով տեղերում, որպեսզի մարդիկ իսկույն վերցնեն ու մասնակցեն մարտական գործողություններին։
Հասարակական գործչի համոզմամբ` ոչ ոք իր տունն ավելի լավ չի պաշտպանի, որքան տեղի բնակիչը, ով իր հողն ու ջուրը բնականաբար սիրում է բոլորից շատ, հետևաբար առաջին արցախյան պատերազմում ձեռք բերված աշխարհազորային փորձը, անշուշտ, անհրաժեշտ է կիրառել նաև մեր օրերում։
«Պետք է պաշտպանել հայրենիքի յուրաքանչյուր մետրը։ Եթե կարծում են, որ Արցախը հանձնելով հնարավոր է պաշտպանել Հայաստանը, ապա դա միանգամայն սխալ մոտեցում է։ Արցախը ոմանց համար բեռ է, իսկ մյուսների համար լինելիության հույս և խորհրդանիշ»,– նշեց Մանուկյանը։
Հիշեցնենք` 2021 թվականի մայիսի 12-ից ադրբեջանական զինված ստորաբաժանումները ներխուժել են Հայաստանի ինքնիշխան տարածք։ Նրանք այժմ գտնվում են Սյունիքի, Վայոց ձորի և Գեղարքունիքի մարզերում՝ փորձելով ամրապնդվել իրենց վերահսկողության տակ անցած հատվածներում։