ԵՐԵՎԱՆ, 8 հունիսի – Sputnik. Թայվանի զինված ուժերն այսօր արձանագրել են, որ Չինաստանի ժողովրդական ազատագրական բանակի (ՉԺԱԲ) 37 ինքնաթիռ է մոտեցել կղզուն: Տեղեկությունըհայտնում է ՌԻԱ Նովոստին՝ հղում անելով Թայվանի պաշտպանության նախարարությանը։
«Այսօր՝ հունիսի 8-ին, ժամը 5:00-ից սկսած` ՉԺԱԲ-ի 37 ինքնաթիռ, այդ թվում՝ J-11 և J-16 կործանիչներ, H-6 ռմբակոծիչ, Y-20 լիցքավորիչ, ինչպես նաև ռադիոընդունման և ուղղորդման ինքնաթիռներ մտել են Թայվանի հարավարևմտյան օդային տարածք», - ասված է հաղորդագրության մեջ:
Նշվում է, որ մի քանի ինքնաթիռ Թայվանի օդային տարածքով մտել են Խաղաղ օվկիանոսի արևմտյան գոտի՝ երկար հեռավորությունների վրա օդային հետախուզության վարժանք անցկացնելու համար։
Դրանից մի քանի ժամ առաջ Թայվանի պաշտպանական գերատեսչությունը հայտնել էր 12 թռչող սարքի ու ՉԺԱԲ-ի չորս նավի մասին, որոնք կղզու զինված ուժերը հայտնաբերել են Թայվանից ոչ հեռու չորեքշաբթի առավոտյան 6-ից մինչև հինգշաբթի առավոտյան 5-ը:
Հիշեցնենք` Թայվանի շուրջ իրավիճակը սրվեց, երբ ԱՄՆ ներկայացուցիչների պալատի նախկին խոսնակ Նենսի Փելոսին 2022 թվականի օգոստոսին այցելեց կղզի։ Չինաստանը, որը կղզին համարում է իր նահանգը, դատապարտեց այդ այցը՝ հայտարարելով, որ ԱՄՆ-ն աջակցում է թայվանական անջատողականությանը: