ԵՐԵՎԱՆ, 8 հունիսի – Sputnik. Հայաստանի տնտեսությունը 2022 թվականին ՀՆԱ-ի աճի տեմպերով համաշխարհային առաջատարներից է դարձել։ Լավ արդյունքները պահպանվել են նաև ընթացիկ տարվա սկզբին։ Այս մասին ասվում է Եվրասիական զարգացման բանկի գլխավոր տնտեսագետ Եվգենի Վինոկուրովի ՝ Եվրասիական տնտեսական միության մասնակից երկրների մակրոտնտեսական իրավիճակի վերաբերյալ մեկնաբանության մեջ:
Փորձագետը նշում է, որ այս տարվա հունվար-ապրիլին տնտեսական ակտիվության ցուցանիշն աճել է 12.2 տոկոսով: Աճը հիմնականում ապահովել են ծառայությունների, առևտրի և շինարարության ոլորտները։ Ֆիզիկական անձանց անդրսահմանային փոխանցումներն ընթացիկ տարվա հունվար-մարտին ավելացել են 2,8 անգամ և կազմել 1,5 մլրդ դոլար:
Վինոկուրովի կարծիքով՝ Հայաստանում պահպանվում է ներդրումային պահանջարկի բարձր մակարդակը։ Հունվար-մարտին հիմնական կապիտալում ներդրումներն աճել են 13%-ով։ Տնտեսությանն աջակցում է նաև զբոսաշրջային բարձր ակտիվությունը. առաջին եռամսյակում երկիր այցելած զբոսաշրջիկների թիվն աճել է ավելի քան 80%-ով:
«Կանխատեսում ենք Հայաստանում տնտեսական աճի բարձր տեմպերի պահպանում, 2023 թվականի արդյունքներով՝ 7,5% աճ։ Կանխատեսումը բարելավվել է Ռուսաստանի վերաբերյալ կանխատեսումը դեպի դրական վերանայելու, ինչպես նաև առաջին եռամսյակում նախորդ տարվա աճի գործոնների պահպանման ֆոնին: Ընթացիկ տարում և առաջիկա մի քանի տարիներին աճին աջակցություն կցուցաբերեն նաև Ամուլսարի հանքավայրի աշխատանքների վերսկսումը և հարկաբյուջետային քաղաքականությունը»,- ավելացրել է բանկի գլխավոր տնտեսագետը:
2024-2025 թվականներին տարեկան կանխատեսվում է մոտ 5% տնտեսական աճ։ 2023 թվականի վերջին սպասվում է մոտ 2,5% գնաճը։ Տարվա մնացած ժամանակահատվածում գների աճը կարող է փոքր-ինչ ցածր լինել Կենտրոնական բանկի նպատակային նշաձողից: Գների աճը զսպող հիմնական գործոններն են հայկական դրամի փոխարժեքի ամրապնդումն ու հումքային ապրանքների համաշխարհային գների նվազումը։ 2024-ի վերջին Հայաստանում կանխատեսվում է 3.3% գնաճ։ Հաշվի առնելով գնաճի կայուն դանդաղումը և սպառողական պահանջարկի աստիճանական կայունացումը` ԵԱԶԲ-ում չեն բացառում, որ Հայաստանի ԿԲ-ի հունիսին կայացած նիստում վերաֆինանսավորման տոկոսադրույքի իջեցում տեղի կունենա: Վերաֆինանսավորման տոկոսադրույքը մինչև ընթացիկ տարվա վերջ կարող է իջնել մինչև 9%:
Հիշեցնենք, որ ԵԱՏՄ-ին անդամակցում են Հայաստանը, Ռուսաստանը, Բելառուսը, Ղազախստանը և Ղրղզստանը: