ԵՐԵՎԱՆ, 7 հունիսի – Sputnik. Եվրասիական տնտեսական միության (ԵԱՏՄ) երկրների առավելությունն այն է, որ կարողանում է ինքն իրեն ապահովել պարենով և մեծ ուշադրություն է դարձնում պարենային անվտանգության հարցերին։ Այս հայտարարությունն արել է ՌԴ փոխվարչապետ Ալեքսեյ Օվերչուկը:
«Մենք անհանգստանալու ոչինչ չունենք։ Ոչ միայն այսօրվա քննարկումը, այլև ընդհանրապես ամբողջ վիճակագրությունը, բոլոր ցուցանիշները խոսում են այն մասին, որ Եվրասիայում, հետխորհրդային տարածքում բնակվող ժողովուրդները միասնաբար կարողանում են իրենց ապահովել պարենով, ուստի այս դեպքում մենք շահեկան դիրքում ենք աշխարհի շատ այլ միությունների և երկրների նկատմամբ»,-ասել է Օվերչուկը Եվրասիական կոնգրեսի շրջանակում ԵԱՏՄ երկրների պատվիրակների հետ գործնական նախաճաշի ժամանակ:
Ռուսաստանի փոխվարչապետն ընդգծել է, որ ընդհանուր անցյալն ու ընդհանուր արժեքները հեշտացնում են ԱՊՀ և ԵԱՏՄ երկրների փոխգործակցությունը։
«Մենք բոլորս խոսում ենք նույն լեզվով, մեր սերունդը, որը ծնվել է այդ մեծ երկրում, ընդհանուր արժեքներ ունի, ընդհանուր աշխարհայացք, ինչը օգնում է մեզ փոխհամաձայնություն գտնել... Մեզ դա է միավորում` ինչ-որ ոչ նյութական քիմիան, որը մեզ թույլ է տալիս դա անել»,-ասել է Օվերչուկը:
Եվրասիական կոնգրեսը բացվել է հունիսի 8-ին Սիրիուսի «Գիտության և արվեստի պարկի» տարածքում: Գործարար միջոցառման շրջանակում ԱՊՀ և ԵԱՏՄ երկրների փորձագետները, քաղաքական գործիչները և երիտասարդ գործարարները քննարկում են պետությունների տնտեսական զարգացման հարցերը: