ԵՐԵՎԱՆ, 8 հունիսի – Sputnik. Արևմտյան պատժամիջոցները նույնիսկ դրական ազդեցություն են թողել, քանի որ ԱՊՀ տարածքում քննարկվել ու կառուցվել են ապագայի ծրագրեր, մասնավորապես` բիզնեսի աջակցման համար։ ԱՊՀ կառավարությունների ղեկավարների խորհրդի հերթական նիստում այս հայտարարությունն է արել Ռուսաստանի վարչապետ Միխայիլ Միշուստինը։
«Հետագայում մենք ավելի մեծ արդյունքների կարող ենք հասնել անգամ արևմտյան պատժամիջոցների ֆոնին։ ԱՊՀ սահմաններում մենք կարողացել ենք խուսափել տնտեսական խորը անկումից։ Հիմա արդեն ԱՊՀ տնտեսությունները այդքան էլ վատ ցուցանիշներ ցույց չեն տալիս։ ԱՊՀ տարածքում տնտեսական անկումը կազմել է ընդամենը 0.5 տոկոս, փոխարենը 2021 թ. համեմատ նշանակալիորեն` 14 տոկոսով, աճել է փոխադարձ առևտրաշրջանառությունը և հասել մոտավորապես 6 տրլն ռուբլու»,– ասել է նա։
Միշուստինը նշել է, որ առաջին կիսամյակում 9 տոկոս աճ է գրանցվել շինարարության ոլորտում, համարյա 3 տոկոսով ավելացել է գյուղատնտեսական արտադրանքը, իսկ հիմնական կապիտալով ներդրումներն աճել են ավելի քան 4 տոկոսով։ ՌԴ վարչապետի խոսքով` պետք է հաղթահարել ներքին շուկայում բիզնեսի խոչընդոտները, ունենալ տեխնոլոգիական ինքնուրույնություն և արդյունաբերության ընդհանուր բազա։
Միշուստինը համոզված է` հաշվի առնելով ԱՊՀ երկրների մրցունակ տնտեսությունը` հնարավոր է պահանջված ապրանք արտադրել բոլոր ոլորտներում։
Հիշեցնենք` ԱՊՀ կառավարությունների ղեկավարների խորհրդի հերթական նիստն անցկացվում է Սոչիում։