ԵՐԵՎԱՆ, 7 հունիսի – Sputnik. ՀՀ զինված ուժերի զինծառայողների ատեստավորման հանձնաժողովում ընդգրկված են վարչապետի օգնականներ, ԱԱԾ պաշտոնյաներ, ինչը բխում է թափանցիկության ապահովման, խնդիրների վերհանման, ինչպես նաև հսկողական գործառույթների իրականացման տրամաբանությունից։ Այս մասին ՀՀ ԱԺ պաշտպանության և անվտանգության հարցերի մշտական հանձնաժողովի նիստում ասաց պաշտպանության փոխնախարար Արման Սարգսյանը։
Նշենք, որ զինծառայողների ատեստավորման գործընթացը մեկնարկել է հունիսի 5-ից։
«Կարևոր է, որպեսզի ատեստավորումը մաքսիմալ օբյեկտիվ մթնոլորտում անցնի, պետք է լինի նաև շատ թափանցիկ։ Մենք բազմիցս հայտարարել են, որ պատգամավորները նույնպես կարող են մասնակցություն ունենալ ատեստավորման հանձնաժողովի աշխատանքներում»,– ասաց Սարգսյանը և հավելեց, որ դիտորդի կարգավիճակում են լինում այդ գործընթացում ներգրավված պաշտոնյաները։
Նրա խոսքով` ատեստավորման առաջին օրը զինծառայողները հանձնել են շարային և ֆիզիկական պարտաստության նորմատիվները, իսկ այսօր կրակելու են հրաձգային զենքերից։ Վաղվանից սկսվելու է մասնագիտական, տեսական գիտելիքների ստուգման փուլը։
Հիշեցնենք, որ ատեստավորում անցնող առաջին խմբի զինծառայողներն են «Պաշտպան հայրենյաց» ծրագրի շահառուները, որոնք քննությունները բարեհաջող հանձնելուց հետո հետագա ծառայությունը կշարունակեն իրենց ընտրած զորամասերում սոցիալական արտոնությունների շոշափելի փաթեթով: